Diaranson Evelyn Vargas, cu ta abogado di Ricardo Martinelli a entrega su mes na autoridad na Mexico, y a ser traslada pa Panama pa Interpol. El a yega Panama cu cara manera rabia y a drenta via aeropuerto internacional di Tocumen, cu hopi escolta.
Evelyn Vargas a ser solicita pa Fiscalia Especial Anticorupcion, cu a pidi Interpol su captura, pa supuesto labamento di placa, relaciona cu cuenta congela na banco na Suisa. Vargas a entrega su mes nuebe dia despues cu Interpol di Francia a publica un alerta cora y a cuminsa cu buskeda di Vargas, di Ricardo Martinelli Linares y Luis Enrique Martinelli Linares, kendenan ainda ta huy pa husticia.
Pakico polis ta busca nan? Fiscalia special anticorupcion kier pa Vargas bay declara den e caso di cuenta congela na Suisa, y cu segun investigacion ta pertenece na yiunan di ex-presidente Ricardo Martinelli. Fuentenan ta opina cu Evelyn Vargas tabata esun cu a relaciona cu e empresa Promotora y Desarollo de Los Andes cu e placa cu tabata warda den banco Suiso, como tambe cu Vargas tabata pusha pa cuminsa cu investigacion na Panama, contra personanan cu tabata relaciona cu e compania ey.
E rumannan Martinelli Linares y Evelyn Vargas ta envolvi den e acusacion aki, pasobra nan ta aparce como miembro di un sociedad anonimo, cu a haya placa den transferencia, for di e soborno di Odebrecht na Panama y otro pais. Di acuerdo cu e proceso penal na Panama, e abogado Vargas lo ser interoga pa fiscal di e caso, y despues fiscal por dicidi si lo aplica medida cautelar manera detencion preventivo, pasobra nan ta acusa di labamento di placa. Te na e momento aki, tin 17 hende acusa den e caso aki.
Colaboracion
Evelyn Vargas a aparece 24 ora despues cu procurador General Kenia Porcell a haci un yamado na personanan envolvi den e caso Odebrecht, pa colabora cu investigacion prome cu dia 1 di juni. Riba dia 1 di juni lo conoce dato importante tocante investigacion realisa na Brasil y na e momento ey, e informacion cu e acusado lo por duna e fiscal, no por ser considera novedoso mas.
Panama tin un ley di colaboracion eficaz, caminda tur hende acusa den un caso manera esaki, por cera acuerdo tocante colaboracion y castigo cu ministerio publico. Si por ehemplo e acusado acepta e acusacion, trece acusacion contra otro persona of duna prueba, cu e informacion ey autoridad por aplica un castigo segun acuerdo entre Ministerio publico, e acusado y su defensor. E acuerdo di castigo, por keda acepta of rechasa pa un hues di garantia, e ultimo aki solamente den caso di sospecho di corupcion, violacion di derecho o garantia.
