ORANJESTAD— E prome caso referente asilo den corte di prome instancia contra pais Aruba y Hulanda plania pa diabierna atardi ta cancela. Abogado David Kock lo anuncia pronto si ta duna un conferencia di prensa riba e topico.

Un caso cu despues di su anuncio weekend ultimo a causa basta conmocion den comunidad, mirando cu un grupo di Venezolano a purba bini via boto, autoridad a detene nan. Despues hues comisario, kende ta comproba si e detencion ta conforme ley, a dicidi cu si e grupo pidi asilo no por mantene nan deteni pa despues deporta. E personanan a bisa cu nan kier pidi asilo, pero e peticion no mester tuma luga na corte si no na autoridad competente di migracion. Nos lo ta buscando informacion cerca e abogado en cuestion y lo informa riba esaki.

Permiso temporario no ta duna acceso na registro civil
Un aspecto interesante referente e permiso cu personanan cu ta pidi asilo ta haya, mientras nan ta warda contesta oficial, ta cu e permiso no ta permiti inscribi den Censo. Tin cierto expertonan legal cu ta bisa cu e personanan cu tin e permiso aki por bringa pa inscribi nan mes den Censo mientras nan ta warda contesta, mirando cu tin biaha ta tuma un aña of mas largo pa ricibi un contesta oficial.

Sinembargo durante conferencia di prensa dialuna minister di husticia Andin Bikker (POR) a declara cu nan no lo por bay den registro civil mes si no e registro temporal. Esaki ta pa entre otro yiunan di tera cu ta studia afo pero cu ta bin pa vakantie y kier inscribi. “Pero nos no ta atendiendo cu esey pa nos propio yiunan di tera, awo nos no ta wak pakico e ora pa un permiso cu nos ta spera di atende di manera rapido, e permiso no lo por dura mas cu par di luna, nos tin cu registra nan den e registro temporal. Pasobra e ta algo nobo pa Aruba awo e ta tardando basta.”

‘Esunnan cu genuinamente ta aplica pa asilo si mester haya proteccion’
Ademas minister a declara cu esunnan cu ‘en berdad’ tin mester di proteccion conforme e tratado (protocol cu Aruba a firma) y cu por comproba esaki nan si lo mester haya proteccion. “Nos obligacion ta pa esunnan cu genuinamente ta aplicando pa un permiso a base di e tratado pasobra genuinamente nan tin mester di proteccion huridico. Pa eseynan si, ora nan pasa e prueba, nan ta haya un permiso cu ta mas cu esun cu ta duna cu lo mester dura no mas cu un par di siman.”

Segun minister, un di e exigencianan halto cu e tratado ta pone ta cu na momento cu e peticionario di asilo drenta e pais stranhero e mester mustra cu e tin miedo pa su integridad personal si mester bay bek su pais. Si no ta aplica di biaha, esaki por ta un echo cu por trece sospecho cu no ta andando seriamente cu e peticion. “E persona si tabata sa con pa move rond y haya trabou mientras e tabata akinan. Pues e argumento cu e persona no tabata sa e procedura ta simplemente un echo. Ademas cu si nan tabata sa con pa yega na un certificado di ACNUR/UNHCR pero no tabata sa con pa pidi asilo aki. E ta un tiki dudoso.”

Procedura pa pidi asilo
E procedura actual segun minister ta cu despues di declara na yegada di frontera cu e persona kier pidi asilo, mester haci un entrevista. Despues di e entrevista ta bay check si en berdad loke e persona ta bisa ta berdad. Por ehempel si e persona ta parti di un partido di oposicion. “Di eynan nos ta tuma decision.”

Aclarando riba esaki minister a splica cu solamente pa via cu un persona a yega un tempo pasa y no a pidi asilo pa basta tempo, no ta suficiente pa nenga nan peticion. “Maske nan por a bini y alarga nan estadia turistico te cu nan no por mas y haya trabou despues disparce den ilegalidad, no ta suficiente pa nenga a base di esaki so. E ta un sospecho funda cu nan no ta andando corectamente pero e no ta e unico base si pa cual e ekipo ta nenga bo peticion.” E team cu ta trata e peticionnan mester trata e aplicacion riba su propio merito, pues a base di e argumentonan y determina si berdad ta un aplicacion cu peso.