ABO – Un partido di hende humilde

Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta. Nos lo bini cu entrevistanan bayendo mas profundo den e vision di cada partido. Den e manera aki abo como votador por keda informa y tin un bista mas amplio pa yuda bo cu bo decision di voto. Awe nos ta continua cu e partido Aruba su Bienestar Organisacion (ABO).

ABO – Un partido di hende humilde
Elton L. Lioe-A-Tjam, lider di e partido ta bisa cu ABO ta representa e futuro di Aruba. Esaki ta un partido cu a ser incorpora riba 10 di December 2014 door di un grupo di ciudadano dedica na principionan democratico. Nan ta considera participacion di comunidad, apoderacion di e individuo como propiedadnan importante cu ta necesario pa crea un sociedad mas consciente, husto y responsabel.  Elton: “Esaki ta un partido cu a wordo lanta door di hende humilde. Ora bo wak e desaroyo di 30 aña cu e mesun partidonan tradicional, cu nos pais aworaki no ta di nos mas, nos cultura no ta respeta y nos ta bayendo bancarota.  Anto ketobay bo ta wak politiconan cu a drenta cu 10 florin den nan saco – cu nunca a traha den sector priva – y kier bisabo cu nan ta e solucion mientras nan ta e problema mas grandi cu nos tin.” Sr. Elton ta agrega cu e pensamento cu bo mester ta un miyonario pa participa den proceso democratico, ta un mito. “Nos ta mustrando tur hende cu solamente bo mester tin hende integro, capacita y cu kier yuda Aruba pasobra nan si ta stima Aruba.”

No ta cumpra voto
Elton ta bisa cu nan ta preparando pa tres aña caba y ta enfatisa cu nan no ta e partido cu ta cumpra voto of cu tin placa pa cumpra promocion. “Pero nos ta e partido cu ta bisa cu un palabra di un homber of muhe mester bal algo mas. Nos ta e partido cu por wak bo yiunan y nietonan den nan wowo y bisanan cu nos a trata di salba Aruba pa bosonan por tin un ehempel y bisa cu tin un Aruba cu ta dimi.” Nan tin tres aña caba den movecion pa e siguiente eleccion. Nan ta den prensa y radio tur siman antoa aworaki tambe ta hayando e oportunidad pa bay riba television pa yega na un plataforma mas grandi.

Partidonan tradicional ta un problema
“Nos no ta un partido cu ta bay bende plannan cu nos no por realisa. Nos tampoco no ta bay gaña pueblo manera cu nan a wordo gaña y te awe tur hende tin tur sorto di plan sin splica pueblo for di unda e placa ta bon of kico esaki ta costa,” Elton ta subraya. E ta bisa cu hopi di nos problemanan tin un nomber y fam cual ta e partidonan tradicional. “Ta nan a gasta e placa y ta nan a habri e fronteranan hancho habri anto haci bo un esclavo, dependiente di nan. Anto nan awo kier laga bo kere cu sin nan bo no por existi. P’esey nos strategia ta: ban bek na normalidad.

Un palabra di un homber of muhe mester bay algo anto esey ta e esencia y salida di tur problema. Si ami no por confia bo of gana bo confiansa sin haci bo un esclavo of primiti bo algo, anto esey ta bisa hopi mas dimi. E ta bisa cu ami ta e bordugo.” Elton ta subraya tambe cu riba ultimo eleccion, 13.000 hende no a bay vota . “Pues tur esunnan cu ta yama nan mes partido grandi of chikito, of tur esunnan cu a bira un “AVP light”, nan ta e mesun grupo di hendenan cu a haci bo un esclavo.” Elton ta conclui cu partido ABO ta para pa e hende anto cu ta abo manera hende ta importante . “For di eynan por bay wak riba plannan y ideanan cu ta den nos. A bira tempo pa nos gara e toro na su cacho y bisa cu e baranca aki ta dimi tambe anto mi ta bay lucha pa e keda asina.”

Video di entrevista cu sr. Elton L. Lioe – A – Tjam