Boneiro Duradero ta start cu un campaña di 10 dia pa un Boneiro mas limpi, of cu otro palabra Dushi Bonaire.
Meta di Reto di Sushi of Dushi (Sushi of Dushi Challenge) ta pa inspira mas tanto habitante posibel riba Boneiro pa participa na un mini limpiesa (mini-clean-up) di solamente 10 minuut.
E Sushi of Dushi Challenge ta traha di e manera aki
: 1. Scoge abo mes un sitio di limpiesa: bo mes bario, rondo di scol of un sitio caminda bo ta traha of por ta e ruta cu bo ta cana diariamente.
2. Saca un potret di e sushi shimaron (BEFORE).
3. Piki e sushi shimaron y saka un potret di e sitio limpi (AFTER).
4. Pone bo potret riba INSTAGRAM of Facebook y stimula asina otro hende pa nan tambe participa.(*E palabra sushi na idioma papiamento tin dos manera di skirbi: sushi y shushi.)
Gana no ta e meta di e reto, pero den caso di Sushi of Dushi Challenge tin tambe algun bunita premio. Participantenan tin chens di gana un les di windsurf pa 5 persona of un paseo priva den e area di naturalesa na Dos Pos. Boneiro Duradero ta spera cu tur hende ta bira mas consciente di e cantidad di sushi shimaron cu tin riba nos isla. Nos tur por contribui activamente na un Boneiro mas limpi dor di: señala sushi shimaron y haci limpiesa di esaki + depone sushi den cos di sushi. Sushi of Dushi Challenge ta di sponsor pa JIBE City, ECHO, Delfins Beach Resort y Selibon. Boneiro Duradero ta un proyecto di Fondo Mundial pa Naturalesa (Wereld Natuur Fonds).
