Prome cu mi a drenta politica, mi a dicidi di traha den diferente sector pa asina conoce kico ta come y biba den sector priva, con duro nos hendenan ta traha, kico ta nan preferencia, kico significa alegria pa cada un di nan, nan preocupacionnan. Semper mi a trata di guia y asisti nan pa e caminda corecto y legal.
Hopi di nos hendenan muhe a wordo silencia pa casonan di acoso sexual (sexual harassment), hopi di nos hendenan muhe a cambia di trabou pa motibo di trampa of wega cu a wordo haci cu nan. E casonan aki no ta yega na Departamento di Labor pa wordo registra y documenta pa asina internacionalmente nos hendenan haya ayudo pa esaki. Pasobra documentando esaki Aruba por haya sancion den varios manera pasobra e no a acudi na ningun caso y a laga su hendenan, muhe of homber, ta victima y no ta haciendo nada pa para esaki.
Sin documentacion di e casonan aki ta mustra cu nos Aruba ta cumpli cu tur ley y cu no tin acoso sexual, abuso emocional y otro forma di abuso cu a y ta tumando luga na pia di trabou. Laga nos no cuminsa riba e tema di mucha y hoben cu tambe ta temanan cu ta hopi delicado y vulnerabel pa no stroba e crecemento di e persona nan aki.
Si un Gobierno ta actua segun ley y ta splica su pueblo con tur cos ta hinca den otro, nan por compronde. E tempo moderno a haci cu comunidad ta bini hunto pa asina demostra nan mal contento riba muraya door di actua contra ley pa medio di grafiti dañando edificio aheno y mas cu palabranan insolente, lubidando cu nos por wordo perhudica den gran escala.
Kico por haci? Demostracion cu ta forma legal, entrega peticion cu ta otro forma legal.
E era di computacion y internet a haci esaki posibel pa bon uso pero tambe mal uso sinta tras di un screen di computer, porta uzando nomber ficticio, y lubida cu e forma cu bo critica abiertamente riba medionan social ta contra ley. Ley di defamacion ta bin na vigor. Contradiciendo esaki tambe tin e ley di libertad di expresion, di vocifera loke pa bo ta importante teniendo na cuenta leynan laboral y comportacion na pia di trabou y den tempo liber. Aki nos norma y balornan lo mester wordo reenforsa ampliamente. Tin leynan Digital pa wordo trata den Parlamento di Aruba y mi ta spera cu esaki lo sosode pronto.
Hopi biaha esunnan cu no ta di acuerdo cu bo pensamentonan ta tira piedra y sconde man. Esaki ta un acto di cobardia. Envez di busca e persona pa combersa cu ne, skirbi’e personalmente un carta, ta apoya e gesto aki. Envez di sinta na mesa y mira tur perspectiva di e situacion cu ta deliberando riba dje, nos ta lanta contra otro, busca sencionalismo, enves di hisa e nivel di oponencia di ta un profesional. Por ehempel coleganan ta wordo tilda, pasado ta wordo treci dilanti, cu consecuencia cu e grupo enves di sigui busca informacion di ambos banda pa siña pensa pa nan mes ta sigi e grupo aki y haci daño na otro sin tin mester.
Na momento cu toca temanan personal, ta laga e persona envolvi sinti su mes ataca den Parlamento di Aruba, cu no ta un berguensa pa e persona cu ta victima sino pa e persona cu ta ataca. Asina hendenan ta haya cu e actornan aki ta duna un bon show, pero en realidad a bisa net nada di loke e trabou di ta un Parlamentario ta of di un Minister. Ministernan tin cu corda cu brinda respet na Parlamentarionan no ta un mester, e ta un deber! Nos Comunidad mester siña crea respet pa nos mesun hendenan, sea nan ta of a forma parti di un gobernacion nan ta hendenan pa respeta. Eleva e nivel di nos Gobernantenan y Parlamento di Aruba ta un prioridad. Hendenan di afo mester bin siña nos ki balor e responsabilidad di un Parlamentario, of di un Gobernante tin? Mira con un persona di exterior ta conoce kico ta e etiquette di vestuario, comportacion, combersacion di un di e lidernan di su pueblo. Den un pais tin varios lider y pa un persona yega na wordo selecta ta pasobra e la cumpli cu rekisitonan cu ta importante como ser humano sirbiendo su pueblo cu curason y carisma. Duna loke bo ta desea di ricibi.
Un gobierno por kita libertad di su pueblo? SI!
Ehempelnan ta sobra. Door di silencia su comunidad, door di menasa su comunidad, door di tin hendenan ta informa cada paso cu un persona cu e gobierno ta mira cu lo ta un peligro pa nan. Den pasado a haci hopi daño na famianan y mas tristo door cu no por a yega na e persona nan adulto a tuma represailia riba nan yiu of famia. Den exterior tin gruponan grandi cu a wordo crea contra Gobierno y na Aruba nos ta evita pa yega asina leu.
Ehempelnan bibo ta wordo perhudica den bo educacion of profesion. Un simpel accident na trabou of bida priva cu a pone cu bo bida den peliger. Bo a mira hendenan wordo premia door di a haci otro daño, y lubida cu e mundo ta drei y situacionnan por pasa y cu e circulo di prosperidad ta subi y ta baha segun tempo. Nos tur a presencia e caida di varios imperio rond mundo pa diferente motibo, hendenan a lanta para pa inhusticia cu a pasa cu nan, apesar di e miedo cu nan tin pa nan wordo silencia te hasta cu morto. Den otro paisnan grandi hendenan ta wordo kima bibo, famianan a wordo secuestra, famianan ta wordo persigui y no por sali di nan cas, pasobra nan libertad a wordo kita di nan pasobra porta un miembro di e famia a haya su mes inocentemente den tratadonan cu a hiba e persona den contacto cu hendenan cu ta wordo considera pa ta den baho mundo.
Den pasado Aruba a conoce casonan asina, casonan cu a paralisa Aruba. Conhuntamente nos tur ta proteha Aruba, e ta nos hogar. Respetando, Uniendo y Fortificando nos hendenan nos lo logra tin stabilidad un biaha mas.
