Via nan pagina di Facebook, Aruba Birdlife Conservation (ABC) a publica un carta habri na entre otro gobierno na unda ta splica cu no mester ta permisibel pa tin disturbio den area di Spaans Lagoen. Esaki a keda publica net un dia prome cu e fiesta organisa pa e compania Odinsa, cual ta programa pa tuma luga awe en conexion cu apertura di e brug nobo riba ‘green corridor’.
“Nos ta spera cu esunnan cu a duna e permiso pa e evento aki, compronde cu e brug ta crusa un ‘Ramsar Wetland area’ cu tambe ta oficialmente parti di Parke Arikok”, segun e comunicado di ABC ta bisa. ABC ta splica cu tin riba 120 tipo di parha registra na Spaans Lagoen y e ta un luga importante pa cria parhanan ‘residente’; mes momento e migracion di parha tambe a cuminsa. Segun ABC esaki nifica cu hopi especie di parga lo bishita e localidad aki despues di a bula distancianan largo.
ABC ta bisa cu tin otro area mas miho pa tipo di actividadnan festivo asina. Tambe nan ta haci un peticion na e organisadonan pa tene cuenta cu entre otro productonan di plastic cu por wordo tira den e lagoen. “Actividadnan festivo mester tuma lugar otro caminda”, ABC ta finalisa bisando.
