Ayera tardi a tuma luga den Corte di Prome Instancia di Aruba e tratamento oral pa loke trata e caso Aruba Birdlife Conservation (ABC) contra Minister di Asuntonan General, Innovacion, Organisacion Gubernamental, Infrastructura y Planificacion Teritorial, y Natura Development NV. Durante audiencia aki abogado representando ABC, G.W. Rep, a presenta e demanda pa medidanan provisional y defensa.

Den documentonan oficial di corte, abogado Rep a remarca, den nomber di ABC cu Hues a pidi pa entrega e peticion pa e permiso di construccion. E permiso cu a ser entrega ta fecha 18 di januari 2023. Sinembargo, a pesar cu ABC a laga sa cu e no tabata den e documentonan, Minister a lubida di entrega esaki den e caso. Di e manera aki, Rep ta indica, no ta posibel pa determina kico Natura tabatin na mente na e momento ey y un referencia na un documento di october 2022 no ta suficiente.

Rep a subraya tambe den nomber ABC cu e retraso di e tratamento oral no ta responsabilidad di nan. Prome nan a tuma 30 di augustus 2023 como fecha, cual hues a cambia pa motibo di problema di convocacion cu Natura. Despues a determina 6 di september 2023 como fecha y segun loke ABC a compronde, Natura a entrega un peticion pa descualificacion, cual a resulta den un otro fecha cu tabata 4 di october 2023. E dia ey tambe abogadonan di Natura no tabata disponible y nan a pidi cambio di fecha atrobe, debi na malesa y ausencia. Ta asina cu 18 di october 2023 e tratamento oral a tuma lugar pa prome biaha.

Mientras tanto, Minister di Planificacion Teritorial a dispone di amplio tempo pa tuma un decision riba e bezwaar, cual nan no a haci. For di e splicacion di e preguntanan poni pa Hues, ta resulta cu dia 11 di october 2023 ABC a entrega un apelacion. Rep ta señala cu loke tabata hopi straño ta cu un notificacion cu a tuma luga ayera, 17 di october, cu Minister di Desaroyo Teritorial diripiente ta activo pa tuma un decision riba e bezwaar di ABC.

Rep ta indica cu den un e-mail di 9 di october 2023, riba peticion di Hues, ABC a reafirma e caracter di urgencia di VoVo 4. El a enfatisa cu e ta trece e parti aki pa dilanti cu e speransa cu esaki por wordo tuma na cuenta.

DWJZ, na nomber di Minister di Desaroyo Teritorial, a contesta cu nan ta warda un sesion di consulta di e Comision di Asesoramento di Opinion pa e casonan di bezwaar di LAR. Ni ABC ni DIP a tende nada for di e comision di LAR tocante ricibimento, prolongacion di un termino of un conseho, y mientras tanto e tempo pa e minister tuma un decision a termina 10 di october 2023.

For di e contenido di e carta di Minister di Desaroyo Teritorial di 18 di juli 2023 (produccion 7 VoVo), Rep ta señala, ta posibel pa deduci cu nan no tin intencion pa trek in e permiso di construccion, debi cu Natura a cumpli cu e condicionnan, cu ta algo diferente cu destrui e permiso di construccion debi cu a viola e ley (LRO, ROPV). Mientras e minister no dicidi pa destrui e permiso, por lo menos revoca y ainda rechasa debi na violacion di e ley (LRO, ROPV), (produccion 7 VoVo), e permiso di construccion ta keda valido.

E posicion principal di ABC den e procedura di bezwaar ta cu e permiso di construccion nunca mester a wordo entrega y mester wordo destrui, of revoca y rechasa debi na e violacion di e ley (LRO, ROPV), cual decision ta di un otro orden mas halto cu un eventual decision di Minister di Desaroyo Teritorial pa trek in e permiso debi cu a viola e condicionnan, entre nan cu actua sin un ontheffing di Minister TINO (un condicion stipula den e permiso di construccion impugna).

Rep ta remarca cu ABC tin interes pa tin un sentencia independiente tocante e permiso di construccion impugna y pa tin te esaki no tin posibilidad cu Natura a causa daño ireversible na e area en cuestion.

E ta resalta cu si na momento cu, uno, Minister TINO duna un ontheffing, si nan kier, bao termino- y obligacionnan of no, y dos e permiso di construccion mes no ta keda suspendi, Natura lo bay directamente pa ehecucion y tuma cuentanan cu eventualmente mester paga un compensacion di daño.

E sentencia di Hues riba tereno di bezwaar/apelacion tocante e pregunta si mester a entrega e permiso di construccion na prome luga lo ta un “fachad” si no tin un disposicion temporal cu ta determina cu mester warda e sentencia aki.

“Daño na naturalesa lo ta ireversible si e permiso di construccion no wordo suspendi segun derecho administrativo. ABC por lo tanto tin un interes urgente den suspension di e permiso di construccion.”

For di e documentonan di proceso entrega, ta menciona cu ABC tin interes y esaki no a wordo discuti (motiva). Tambe, Hues den hopi caso ta wak ABC como interesado pa naturalesa.

ABC a entrega apelacion riba 18 di juli 2023 y riba 19 di juli 2023 a haci un peticion VoVo. Cu esaki ABC ta admisible den su peticion y ta pone enfasis riba e punto cu nan a pidi pa esaki keda valido te cu un decision den un proceso di apelacion.

Rep ta subraya cu coincidentemente, Minister di Desaroyo Teritorial posiblemente a hiba un BOB prome pa e tratamento, caminda posiblemente nan lo kier logra cu Corte den Prome Instancia no ta controla su decision riba contenido. Sinembargo, esey no ta e caso, manera ta wordo demostra den Texto & Comentario di articulo 81 di Ley di Derecho Administrativo (NL).

E decision di Minister di Desaroyo Teritorial ta sigui ta un decision di Hues di decision importante, sigur pasobra Minister di Desaroyo Teritorial te awe no a duna motibo y delanta a laga sa cu nan lo nenga e bezwaar di ABC. El a agrega cu ta bay yega un momento tambe cu si Natura haya luz berde, nan lo haci tur esfuerso pa realisa nan plan. Natura ya a demostra cu nan ta dispuesto pa bay duro y cu cualkier prijs pa realisa nan proyecto di lama.

Tabata na juli ultimo cu hues a duna su veredicto den e caso di Aruba Birdlife Conservation (ABC) contra Natura NV, desaroyador di Embassy Suites, pa stop construccion di un beach ya cu tabata contra leynan di proteccion di especienan nativo di Aruba.

Por lesa mas informacion di esaki bishitando nos link https://www.bondia.com/hues-ta-prohibi-natura-nv-di-construi-beach-te-ora-cu-obtene-un-ontheffing-di-ministerio-di-naturalesa/