Manera a keda publica den nos edicion di ayera, diaranson 18 di october a tuma luga e prome tratamento oral di e caso di Aruba Birdlife Conservation contra Natura Development NV pa loke ta e construccion riba lama dilanti e hotel nobo Embassy Suites. Durante audiencia aki abogado representando ABC, G.W. Rep, a presenta e demanda pa medidanan provisional y defensa.

Den e articulo publica den nos edicion di ayera por a lesa e prome parti di e puntonan remarca pa abogado Rep pa loke ta e medidanan provisional. Den e articulo di awe, por sigui lesa mas di e puntonan aki y tambe e motibonan pakico Minister RO mester a rechasa e permiso di construccion aki.

E abogado ta indica cu den e marco di evaluacion e consideracion cu mester ser traha ta den articulo 54 di LAR, e pregunta tocante e urgencia pa suspende e permiso di construccion y pa tuma medidanan provisional. E pregunta si Natura tin derecho riba un ontheffing no a ser trata diaranson, esaki ta un asunto cu por surgi durante un posibel procedura contra Minister TINO.

Den e caso di e VoVo aki, e ta referi na evaluacion di entrega di e permiso di construcciony nada mas. Pa e motibo aki, Rep ta señala, e informe di experto presenta na ultimo momento pa Natura por keda afo di e discusion. Ademas, no tabatin obhetividad y derecho di scucha y contesta, Natura a paga y resultadonan tabata cla prome cu nan a cuminsa.

Tambe, segun e abogado, tur otro documentonan presenta pa Natura cu ta relaciona cu e ontheffing no ta relevante den e VoVo aki pasobra ta trata tocante e validez di e permiso di construccion. E unico comentario cu ABC ta haci tocante e ontheffing ta cu e condicionnan ta inclui den e permiso di construccion y si Natura tabata contra e condicionnan aki, nan mester a apela den 6 siman despues di 16 di juni 2023. Awor cu nan no a haci esaki, ta considera cu e condicionnan a wordo acepta.

E marco di evaluacion ta pues e pregunta si mester a permiti e permiso di construccion basa riba e disposicionnan legal. E permiso di construccion ta legal basa den e LRO. Segun articulo 23 seccion 5 di LRO, un permiso di construccion ta ser nenga unicamente riba e base di un of mas di e siguiente circunstancianan:

E trabao of e actividad ta bay contra ROPV of e regulacionnan prescribi pa esaki den ROP;

Pa e trabou of e actividad ta necesario un permiso segun un otro regulacion legal y esaki no a wordo otorga.

Prome motibo di negacion

Abogado Rep ta indica cu segun Plan di Desaroyo Teritorial cu regulacionnan (ROPV) tin un destino di “Zona Maritimo” riba e tereno caminda kier haci e plan di construccion di un lama. ABC a demostra esaki cu e mapa di DIP cu nan a usa y tambe a referi na e situacion actual. E permiso di construccion, manera a wordo otorga a base di decision (ministerial) di 16 di juni 2023, ta relaciona cu construccion di un Playa riba tereno di dominio.

E intencion di e actividadnan den e Zona Maritimo ta pa crea un playa. Esaki ta bay contra (e intencion di) ROPV actual cu ampliacion di e playa riba costo di Zona Maritimo – den ROPV tin diferente destinacionnan, incluyendo Zona Maritimo y Playa –y e limite entre e Playa y Zona Maritimo, cu ta explicitamente marca ariba e mapa di plano cu ta forma parti di ROPV, ta ser kita. Ya pa e motibo aki solamente, segun articulo 23, seccion 5, parti a di LRO, no ta posibel pa otorga un permiso di construccion.

Rep ta remarca cu uso di e tereno manera Natura ta pretende no ta cuadra den e funcion di e area “Zona Maritimo”. Door di elevacion y/of nivelacion di e fondo di lama den conexion cu e realisacion di recuperacion di tera pa construccion di playa, añadi na e tereno di dominio, e destino y funcion di “Zona Maritimo” ta cambia en realidad pa uno di “Playa”. Pues ta trata di un construccion di lama.

ABC a referi, un biaha mas, na e dos mapa cu por haya via dip.aw y cu a wordo presenta como produccion 4 di VoVo. Tambe nan ta referi na produccion 5 di VoVo, caminda Natura a protesta contra un presentacion na DIP y a indica cu nan kier lanta un parti grandi di e tera di dominio –Zona Maritimo – pa converti esaki den Playa (cual tin otro destinacion segun ROPV).

Tambe, ABC ta referi na e potret aereo presenta como produccion 9 di VoVo, cu ta demostra cu e tera ta tera di dominio, y tambe na produccion 10 di VoVo – otro potret – unda ta mustra cu loke Natura kier converti pa destinacion di Playa, awor ta Zona Maritimo. Tambe e potret ta mustra di ki manera e trabaonan tabata causa daño na naturalesa. Tocante e retiro di yerba di lama, Rep ta indica cu tin un rapport tambe di dia 23 di juni 2023 realisa pa DNM.

El a subraya cu articulo 23 di LRO ta envolve un sistema limita di motibonan di rechaso. Esaki ta nifica cu un permiso di construccion por wordo rechasa unicamente riba e motibonan menciona den e disposicion aki, mientras cu ta valido si un di e motibonan di rechaso ta presente, e permiso di construccion mester wordo rechasa a base di esaki. Den e decision si un permiso di construccion ta ser otorga, ta trata di un decision yama “gebonden beschikking”.

Un “gebonden beschikking” ta nifica cu Minister RO no tin libertad di evaluacion of seleccion, pero mester nenga e permiso di construccion riba base di esaki. Si ta asumi cu e permiso di construccion ta bay contra e regulacionnan di ROPV, esaki ta nifica automaticamente cu e mester wordo nulifica.

Di dos motibo di rechaso

Rep ta señala cu den e expediente di bezwaar y den e VoVo, ABC a remarca adicionalmente cu tambe den e destino di Playa (pero cla tambe den Zona Maritimo), no ta permiti construccionnan.

Pa e motibo aki tambe e ta bay contra ROPV y e peticion di permiso di construccion mester wordo rechasa.

Di tres motibo di rechaso

E abogado a indica cu esaki ta conta tambe pa e siguiente motibo menciona den e VoVo pa rechasa e permiso di construccion na e momento ey, cual ta e regulacion general pa permiso di construccion regla den articulo 5 di ROPV, caminda den articulo 5.1, parti b di ROPV, ta menciona cu Minister RO por otorga e permiso di construccion solamente si e actividad ta cuadra den e funcionnan menciona pa e destinacion concerni y si e no ta menasa e balornan di paisahe, natural, ecologico, arkeologico, cultural of geologico presente na e luga mes of den e bisindario, ni tampoco na e bon maneho di awa di lama y e drenamento di awa di yobida y awa di superficie.

Den un parti di e peticion di VoVo, ta cla tambe cu den un distancia di menos cu 50 meter for di liña di fluho, tin exigencianan extra pisa cu tampoco no a cumpli cu nan.

Por lo tanto, Rep ta conclui cu tin tres motibo riba cual Minister RO na e momento ey mester a rechasa e permiso di construccion y no tabatin libertad di maneho den nan.