ABC Tours: ”E accidente no tin nada di haber cu velocidad halto”

Den cuadro cu e accidente cu a tuma luga Diahuebs merdia na Parke Arikok caminda un jeep di e compania di ABC Tours a bolter, representante di ABC Tours ta conta Bon Dia cu e accidente no tin nada di haber cu velocidad halto y ta pidi medio di prensa y publico en general cu no sa exactamente kico a pasa, pa stop di duna mal informacion.

”Pa di prome, riba e caminda ey no por core cu  velocidad halto pasobra cu e ta un caminda masha smal mes y nunca ta permiti pa core cu velocidad halto den e area ey. Semper nos ta avisa nos chauffeurnan pa core cu hopi cuidao y nan mes ta trahadonan hopi responsabel”, representante di ABC ta splica.

ABC Tours ta agrega cu tabata tin un ”wervel wind” (un Warwaru) cu a pasa net riba e jeep cu tabata na e momento ey coriendo patras di 4 of 5 otro jeep y esaki a causa cu e chauffeur no por a wak bon. 
Den e momento ey, ABC Tours ta sigui splica cu e chauffeur a topa cu un baranca y el a core dal un brik, pega den e baranca y esaki a causa cu e jeep a bolter. Esaki tambe tabata locual tur e turistanan a bisa segun ABC Tours. 

Tur turista ta bek riba barco
ABC Tours ta splica cu tur cos a bay bon cu e turistanan cu a sali herida, y cu nan a subi barco bek sin problema despues di nan bishita na hospital. Ningun hende a kibra weso of sufri di ningun otro herida serio fuera di cortanan y sla chikito. E chauffeur tambe  a sali for di hospital sin ningun problema.