Manera conoci pa e miembronan di prensa, organisacion Aruba Birdlife Conservation a haya como boluntario nobo Armando Goedgedrag, kende hunto cu co- boluntario Ainhoa ​​Gogorza, a uni pa haci un training formal certifica pa e asina yama “Western Burrowing Owls”.

Igualmente nan a informa cu Aruba Birdlife Conservation ta trahando cu ‘Global Owl Project’ y su director David Johnson, riba un proyecto di conservacion di e shoconan na Aruba, unda e ta train e boluntarionan personalmente.

Expertonan di ‘Global Owl Project’ a duna dos tayer na Aruba, y e di tres ta planea pa fin di e aña aki.

Aruba Birdlife Conservation su intencion ta pa ubica 500 neishi artificial na diferente parti rond di Aruba durante e añanan cu ta bin. Un di e peligronan mas grandi pa e shoco di Aruba ta nan luga di pone neishi cu ta disparciendo, entre otro, pa motibo di demasiado construccion, falta di planificacion y regulacion di e exceso di turismo relaciona cu actividadnan di recreacion, manera ‘off-road’.

Nan a indica, basa riba trabounan di observacion di conducta y vocalisacion di e shoco di Aruba, cu ‘Athene Cunicularia Arubensis’ ta un especie nobo di shoco. Analisis di DNA, vocalisacion, morfologia y distribucion ta e 4 variabel cu lo yuda pa determina si en berdad e shoco di Aruba ta un especie nobo. Mas a leu ta wordo calcula cu e shoco tabata na Aruba pa mas di un miyon y mei di aña, hopi mas prome cu e ser humano a pone pia riba nos isla, unico isla na Reino Hulandes cu tin e existencia di shoco.

Di mesun manera, nan tambe ta desaroyando un proyecto pa conservacion di Prikichinan, ‘Aratinga Pertinax Arubensis’ (e nomber cientifico tradicional) a baha drasticamente. Similar na e programa di conservacion di e shoco di Aruba, e programa di conservacion di prikichi lo encera tambe ponemento di un gran cantidad di neishi artificial na diferente luga rond di nos isla.

Aruba Birdlife Conservation a gradici na su ekipo di boluntario e trabounan cu nan ta haci pa rescata e especienan aki cu ta den peliger di extincion, y e asociacion cu ‘Global Owl Project’ ta hopi importante pa e guia y training cu su boluntarionan ta haya ricibi di parti di su director, Johnson.

Na 2012 a declara e shoco como simbolo nacional di Aruba, y e prikichi na 2017 como e parha nacional. Di e 270 especienan di parha registra na Aruba, e shoco y e prikichi ta e unico dos especienan endemico di Aruba.