ORANJESTAD – Relaciona cu e proyecto di hotel di 600 camber na San Nicolas, Stichting Aruba Birdlife Conservation a emiti den transcurso di diabierna un carta caminda nan ta laga nan punto cla. E carta ta bisa textualmente:
“Apreciabel boluntario-, partner-, sostenedonan y publico en general,
Algun minuut despues di e publicacion di NoticiaCla awe nochi, dia 7 di februari 2019, cu un hotel lo wordo construi den Colony, ABC y algun NGO socio a ricibi e adhunto ‘Environmental Impact Assessment Baby Beach Hotel’.
Como cu nos no conoce niun di e companianan aki, y nos por conclui unicamente cu no tabatin e proceso debi den cual publico y e NGO relevante ta wordo duna un oportunidad serio pa participa den forma significante, tanto di parti di gobierno como di e companianan envolvi, ABC ta rechasa e EIA aki, como tambe e proyecto concerni.
Den un gobierno cu ta boga di integridad y transparencia, no tin espacio pa e conducta poco profesional y cuestionabel aki.
E tesoronan precioso cu ta pertenece na comunidad Arubano ta merece un standard di conducta hopi mas halto di esunnan cu ta simplemente forsando e proyecto aki riba e muchanan di Aruba.
Gobernacion transparente ta rekeri participacion oportuno y comprometi di e NGO relevante y stakeholders, y esaki ta completamente ausente.
Ta absolutamente inapropia y falta di respet pa comunidad Arubiano pa pusha un proyecto asina, mientras un plan espacial (ROP 2019) ta den preparacion, y un regimen legal restrictivo ta activo (‘Voorvereidingsbesluit R.O.P. en R.O.P.v.’), y esaki net despues cu gobierno a declara un moratorio.
Nos ta tuma e libertad di comparti esaki cu comunidad completo pa sirbi e interes di transparencia y integridad. ABC di e forma aki ta pidi pueblo en general pa reacciona na e desaroyo aki via e canalnan apropia, na e instancianan relevante, y sin lubida bo representantenan politico.
Cu hopi tristesa,
