Diamars pasa na Renaissance Convention Center a tuma luga ASIS Safe & Security Conference 2019, tocante e modelo di siguridad Israeli, prevencion di delito pa via di diseño ambiental, desaroyonan na siguridad di hotelnan, planificacion di continuidad di negoshi y shooter activo, pa finalisa cu un panel di discusion cu expertonan di cuerpo di polis y gobierno, representa pa minister di Husticia, Andin Bikker.
Bon Dia Aruba a entrevista Aaron Antersijn, kende ta presidente di e comite di miembresia di ASIS Dutch Caribbean, y el a splica cu esaki ta e prome ‘safety security conference’ na Aruba como ASIS Dutch Caribbean chapter. Esaki ta un chapter internacional cu tin mas di 134 pais y for di eynan nan a logra di haci e prome conferencia na Aruba.
E conferencia aki tabatin e presentacion di speakernan di pafo di diferente como por ehempel, Amotz Brandes- Managing Partner Of Champion desde Los Angeles, Clarence Izzard- Director Global Safety y Security Marriot Vacations Worldwide Corporation, Malcolm B. Reid- FBCI, CPP, CFE, CBCP vice-presidente regional di ASIS Internacional, Darrel Clifton- CPP, CBS, Executive Director of Security desde Reno Nevada, Russel Kolins- doño di Kolins Security Group y Miguel Figaroa- Manager Security di JetBlue International.
Den e conferencia a papia riba e situacion si Aruba ta prepara pa cuminsa legalisa pa maneha siguridad den e pais.
El a comenta cu e publico cu a asisti tabata publico profesional, mayoria di e personanan ta trata den siguridad pero na nivel di manager, supervisor, asina tambe como doñonan di negoshi y gerente di hotel.
Di mesun manera, Antersijn a bisa cu e conferencia aki ta habri e wowonan di hende, pa motibo cu tin cosnan di afo cu por afecta Aruba localmente. A splica varios strategia pa protege turismo, cu ta e pilar mas grandi di economia. Awendia tin hopi diferente tipo di crimen cu tin relacion cu terorismo, y p’esey Aruba mester ta prepara un tiki mas miho pa conserva e nomber di un ‘isla safe’.
