(AP) – A$AP Rocky su acusador, ex amigo y testigo clave a duna su testimonio diamars cu nan relacion tabatin hopi tempo tenso, y a explota dianan prome cu Rocky supuestamente a dispara den su contra.
Rocky, e rapper y partner di Rihanna, a declara su mes inocente na dos cargo di agresion cu arma di candela semiautomatico. “E ta famoso,” Relli a bisa hurado diamars. “Ami no ta niun hende.”
Relly, ken su nomber real ta Terrell Ephron, a describi con su persona y Rocky, naci Rakim Mayers, tabata parti di e mesun colectivo di creador y emprendedor aspirante na New York cu tabata yama nan mes A$AP.
Nan tabatin un amistad cercano pa varios aña, mientras cu Rocky a haya fama y Relli a drenta maneho di musica.
Relli a conta cu nan tabata manera ruman y tabata wak otro tur dia, “te ora cu el a bira famoso.” Despues, segun e ta conta, e no tabatin tempo pa su amigo.
“Semper tabata asina. E ta hopi dificil pa tin un relacion cu Rocky, e ta gana hopi,” Relli a testigua. “Mi tabata yam’e e homber di 6 luna. Mi tabata wak e cada 6 luna. Ora cu e tabata bin e tabata falso. Ta pa kico nos ta den e cos aki yama A$AP?”
Relli a bisa cu e ultimo cos cu e tabata kier haci ta pleita cu un persona asina prominente manera Rocky, pa motibo cu su carera “lo caba. Literalmente bo no tin un carera.”
Aunke Relli a cuminsa papia keto y insigur na comienso, poco poco el a cuminsa tuma un tono mas fuerte ora el a describi momentonan prome cu e confrontacion a tuma luga na Hollywood, unda ambos tabata riba un trip separa. Rocky a keda wak Relli sin kita s mirada durante e testimonio.
Relli a scucha Rocky ta bisa yen di palabra ofensivo contra un persona mientras e tabata den un SUV cu un amigo mutuo e dia prome. E telefon tabata riba speaker, algo cu Rocky aparentemente no tabata sa.
Procurador di Districto Paul Przelomiec a pidi’e pa lesa un serie di mensahenan di texto cu Rocky a manda dia 6 di november 2021.
Ambos a keda di acuerdo pa topa y Relli a bisa cu el a pensa nan lo discuti pero reconcilia. El a bisa cu aparentemente rocky tabatin otro ideanan. Fiscalnan a acusa cu Rocky a saca un arma di candela y a dispara dos biaha contra Relli, ken ta bisa cu e balanan a raspa su knuckle.
E defensa ta argumenta cu Relli tabata e agresor y Rocky a dispara un arma pa separa un pelea entre su persona y otro miembro di nan ekipo. Nan a bisa cu Rocky tabatin e arma cual solamente ta dispara loke ta yama ‘blanks’, pa seguridad.
Prome cu a trece hurado den e sala, defensa a revela cu nan no tin e arma di candela.
“E arma aki ta existi?” e hues Matthew Arnold a puntra, na cual e abogado di Rocky Joe Tacopina a contesta cu “e arma tabata existi pero nos no tine awo.”
Rocky su abogadonan a bisa cu Relli, ken tambe a entrega un demanda civil, ta motiva pa “mentira, celos y codicia” y a fabrica gran parti di e storia pa haya placa.
Anteriormente diamars, e defensa a examina un agente cu a responde na rapportnan di un tiroteo tocante e ausencia di evidencia na e escena.
Tacopina a puntra “no tabatin señal cu un tiroteo a tuma luga?” na cual Sgt. Thomas Zizzo a contesta “no.” Tambe a puntra si no tabatin sanger na e escena, buraco causa pa un bala of evidencia fisico cu un tiroteo a sucede, tur na cual Zizzo a contesta cu no.
Video di Zizzo su camara a ser pasa den corte y por a wak 7 oficial cu a busca den e area y escena di e incidente pero no a haya nada. Den su testimonio diabierna, Zizzo a bisa cu mientras cu polis a busca cautelosamente, ta existi e posibilidad cu nan “no a ripara algo.”
Rihanna, ken ta pareha di Rocky y mama di su dos yiu homber, no tabata presente den corte. Rocky su abogadonan a bisa cu un aparicion no ta probabel pero si posibel.
