For di corespondencia reciente entre secretario di estado pa asunto di Reino, Raymond Knops, y Prome Minister Evelyn Wever-Croes, por deduci cu no solamente den proximo reunion di Conseho di Ministro di Reino e conseho pa un aanwijzing di CAft ta riba agenda, y cu tambe Aruba lo mester presenta un solucion aceptable pa e formalisacion di e acuerdonan di e protocol di november 2018 den un cuadro legal. Den ambos aspecto un decision negativo pa Aruba a bira practicamente inevitable.
Den un carta fecha 7 di october 2019, Knops ta indica na Prome Minister Wever-Croes cu ainda e no ta satisfecho cu e hecho cu gobierno di Aruba no a cumpli cu e acuerdonan di e Protocol di november 2018 cu mester a bay den un cambio di e ley di supervision financiero pa Aruba (conoci como LAft). E ta pidi un biaha mas pa cambio mas pronto posible articulo 14 di LAft pa Conseho di Ministro di Reino por haci su trabao na manera adecua. Tambe ta ‘pidi’ pa trece un proposicion adecua pa mas tarda dia 18 di october den reunion di Conseho di Ministro di Reino.
Despues Knops ta pasa pa trata de siguiente asunto cu ta e conseho cu CAft a duna, pa duna gobierno di Aruba un ‘aanwijzing’ a base di articulo 12, inciso 2, di LAft. Knops ta anuncia cu pa esaki e lo entrega un propuesta di aanwijzing na Conseho di Ministro y e ta trata di haci esaki caba pa e proximo reunion dia 18 di october. De paso Knops ta mustra Prome Minister riba e posibilidad di apela tal decision, den cual caso e asunto ta bay Raad van State pa un conseho, unda Raad van State lo duna un opinion tambe riba e base huridico di tal decision.
Pa loke ta e punto mas controversial den e diferencia di opinion entre CAft y gobierno di Aruba, cu ta e inclusion si of no di e gastonan di personal di e Plan di Crisis Social den presupuesto di Pais Aruba, Knops ta laga sa cu e ta keda di mesun opinion cu CAft, esta cu mester inclui esakinan.
Tambe Knops a haya necesario pa casi na final di su carta haci un apelacion na gobierno di Aruba pa mantene obhetividad den tratamento di e asuntonan aki. Knops: “ Ta di importancia entre otro den e cuadro aki, pa cu tanto Hulanda como Aruba limita nan mes, paden y pafo di e murayanan di ‘Treveszaal’ na menciona hecho y e acuerdonan berdaderamente traha. Comunicacion cu ta bay mas aya di esey, ta haci cooperacion dentro di e Conseho di Ministro di Reino innecesariamente dificil.”
