Actualmente Aruba Airport Authority N.V. (AAA) ta den proceso pa busca un operador pa e terminal di FBO/General Aviation pa Aruba su Aeropuerto Internacional Reina Beatrix. Segun un comunicado di AAA, nan a tuma nota di un articulo cu a keda publica den medionan di comunicacion riba 6 di december, pa cual nan kier aclara e locual a wordo treci padilanti.
E comunicado di AAA ta bisa cu e acuerdo di concesion cu actualmente AAA tin cu Universal Aviation Aruba N.V. lo termina 31 di December 2017. “Como resultado AAA publicamente, tanto localmente y internacionalmente a emiti e proceso di ‘Request For Proposal’ (RFP) na September di 2017.”
Segun AAA, proposicionnan a wordo ricibi siman pasa for di e varios companianan interesa den opera e terminal di FBO/GA. “Actualmente AAA ta evaluando tur e proposicionnan ricibi y e decision final ta plania pa wordo tuma dentro di algun siman. Pues no tin ningun negociacion tumando luga cu un operador nobo, pasobra ainda no a scoge un operador manera e proceso di RFP ta stipula”, e comunicado a termina bisando.
