A yega tempo… Pa tuma decision…

Ta birando urgente pa yega na un acuerdo cu Hulanda. Esey nos por destila di diferente accion cu ta tuma lugar den e dianan aki. Ehemplo di esey ta e carta di urgencia cu e gremionan empresarial ATIA, AHATA y KvK a manda ayera pa nos Promer Ministro, den cual nan ta urgi gobierno pa bay di acuerdo cu e condicionnan cu Hulanda ta pone pa duna ayudo. Sin e ayudo aki, simplemente Aruba no ta sobrevivi, ta e mensahe. Tambe, gobierno mes ta indica cu pa mitar di otro luna no tin placa mas, y ta bisa tambe cu e posibilidadnan di haya otro inanciamento ta practicamente cero, loke ta berdad pasobra pa haya prestamo den exterior lo mester di aprobacion atrobe di e mesun Hulanda.

E gremionan ta mustra riba e posible scenario cu lo surgi na momento cu Aruba nenga e acuerdo cu Hulanda, cu e consecuencia cu economia lo collapse, causando bancarota y desempleo na gran escala. Esaki lo por parce un scenario exagera pa esnan cu ta kere ainda cu si nos nenga e ayudo di Hulanda lo tin un otro ruta pa yega na recuperacion di nos economia, manera e rumornan tocante ayudo di China, cu ta core rond den e dianan aki. Riba esey nos por ta corto tambe: nan no por drenta sin aprobacion di Hulanda. Y no lo ta promer biaha cu Hulanda ta para intento Chines pa crea ‘un estado dentro di estado’ na Aruba. Djis corda riba e caso di PetroChina, cu tabata exigi 100 aña di erfpacht y nan propio vigilancia Chines riba e tereno. No ta gobierno di Aruba di e tempo ey a para nan…

Pero poniendo esey un banda, nos ta den un situacion hopi mas dificil cu na maart/april. Riba e paralisacion di economia e tempo ey, a bin dos problema nobo. Un ta e manera con nos partner economico principal ta maneha su crisis di Covid-19, cu ta haci cu pa basta tempo nos no por conta cu turismo na e volumen di custumber. Merca a bira lider mundial di coronavirus, cu e agravante cu si no tin un cambio den Cas Blanco, e maneho di e pandemia no ta bay cambia. Cu esey e proyeccionnan cu por tabatin pa 2020 y 2021 lo mester di revision.

Pa colmo, nos mes pa descuido colectivo y pa maneho deficiente di e crisis, ta den un situacion hopi grave awor. No a yega na un lockdown, y sigur ningun hende ta desea esey, pero e perspectiva cu nos lo por laga gradualmente mas turista drenta den e lunanan nos dilanti, cu e virus na un nivel manehable, no ta existi mas. Ademas, no tin awor un proyeccion creible di con nos ta sali di e crisis nobo di salud aki. E doble problema nos dilanti ta cu nos no por habri porta pa mas hende drenta, pero e pregunta ta tambe ta cuanto lo sali for di e partner economico principal aki. ‘Changa’ ta e termino di domino aplicable den e situacion aki, ademas ‘cu doble seis horca’, nos lo bisa. Den e situacion dificil y complica ainda naturalmente tin hende cu ta haya cu no mester acepta e oferta Hulandes, pero no ta elabora riba kico mester pasa y kico lo bay pasa si subi e caminda desastroso aki. E berdad ta cu den e caos cu ta surgi despues, ta inimaginable cu no ta bin un intervencion Hulandes, pero e biaha aki bao di otro articulo di Statuut. E carta di e gremionan di cual tin un relato den e edicion aki, ta referi tambe na e circunstancia, cu e collapse di economia y e posible desorden cu lo surgi, ta obliga Reino (Hulanda) interveni pa restablece orden. Y no kere cu esey no por tuma lugar pasobra den pasado esaki a yega di pasa caba. Pero loke ta mas importante pa señala aki ta cu e opcion di nenga ayudo y wak con e barco ta pega riba cay, finalmente no ta hiba nos ningun caminda, en todo caso no na un situacion cu ta significa un adelanto pa e gran mayoria di nos poblacion.

Awor, si nos haya e pregunta cu pakico nos no ta mustra comprension pa e politico y otro ciudadanonan cu ta di opinion cu e intervencion Hulandes ta bay mucho leu, y cu nan lo por yuda tambe sin pone tanto condicion, esaki ta e contesta: sigur nos ta comprende, pero no defende e perdida di poder di e politico local. Despues di varios decada esnan cu a yega na poder por a haci y deshaci manera nan ta haya ta bon, ta pesey nos tin un finanzas publico den situacion di bancarota, cu no por ni maneha un crisis chikito, corda un grandi manera esaki. Pa pone esaki un biaha mas den perspectiva financiero: si nos tabatin un debe publico normal y manehable, bao di 40% di GDP, nos lo por a fia loke nos tabatin mester bao condicion normal. E ta keda hopi placa pa paga back, pero lo tabata por. Mal gobernacion a pone nos unda nos ta awe, y ainda e hendenan aki no ta desea pa nada cambia? E Hulandesnan no ta bin regla cuenta cu nos, pero si cu e politiconan cu a desgracia e lugar aki.