A yega tempo pa formalisa industrianan cultural y creativo na Aruba cu Conferencia Creactivo 2024

Ayera Go Cultura Foundation oficialmente a anuncia nan di prome conferencia pa industrianan cultural y creativo denomina “Creactivo” e cual lo tuma luga dia 8 y 9 di october na Renaissance Convention Center.

Edjean Semeleer vice-presidente y co-fundado di Go Cultura Foundation a señala cu e fundacion ta celebrando nan di 7 aniversario y parti di e trabaonan cu nan ta bin haciendo den añanan aki ta pa empodera e sector cultural y creativo di e isla pero tambe pa crea oportunidad, conscientisa riba e importancia y pone mas enfoke riba e potencial di industrianan cultural y creativo di Aruba.

Tocante e tipo di industria aki, Semeleer a bisa cu na otro paisnan di mundo a ser formalisa, reconoci y desaroya como tal unda por pensa riba industrianan di pelicula, musica, video gaming, coding, entre otro mas, cu ta bao e capa di industrianan cultural y creativo.

“Y nos ta pensa y convenci cu aki na Aruba a yega tempo pa como colectivo nos tuma iniciativa di keda pusha pa nos por formalisa e industria aki y desaroya nan tambe na Aruba.”

Parti di e vision di Go Cultura ta pa crea plataforma pa dialogo pero no solamente esey, si no pa crea plannan di accion pa asina por move den direccion y crea mas pa oportunidad esnan den sector aki.

Den esfuersonan aki, nan ta anuncia un conferencia cu pa prome biaha ta tuma luga na Aruba poniendo enfasis riba e balor y potencial di industrianan cultural y creativo di Aruba denomina “Creactivo, e cual ta un movemento di un grupo grandi di artistanan, visionarionan, lidernan cu ta bin hunto pa asina nos crea e oportunidad pa dialogo pero tambe pa accion.”

Esaki lo tuma luga dia 8 y 9 di october den Renaissance Convention Center y durante e dos dia aki e luga aki ta bay ta un plataforma pa combersa riba e varios motibo dicon e industria aki ta importante.

Algun di e topico cu nan ta bay pone enfoke riba dje ta bay ta e balor di arte y importancia di desaroya creatividad den sistema di enseñansa pero tambe e balor di e industrianan aki pa cu e transformacion social y diversificacion economico. Ademas di ki impacto e industrianan aki tin hasta den otro industrianan. Den caso aki por pensa riba e pilar principal di Aruba su economia cu ta turismo, cu tambe industria creativo tin un impacto hopi grandi riba dje “y nos ta tuma e iniciativa pa sigui traha y por sigui haci Aruba un destinacion hopi diverso pero tambe autentico den region Caribense,” Semeleer a sigura.

Durante e conferencia aki tambe nan ta bay papia riba e importancia di haci investigacion, colecta data y con importante ta pa crea un base hopi solido caminda e sector por continuamente expande e conocemento pa bira cada biaha un miho empresario cultural of creativo, ademas eventualmente e servicio of producto di e empresario aki por wordo exporta pa mundo henter.

Departamento di Cultura tambe ta un di e aliadonan importante den e esfuerso aki y cu tambe ta forma parti di e conferencia Creactivo, den esaki, Junior Arends, a splica cu gobierno for di basta aña caba a incorpora industrianan creativo como parti di su maneho.

“Esaki ta un responsabilidad publico, en conhunto cu sector publico como tambe sector priva, pa sostene y promove nos industrianan creativo. E partnership di Go Cultura y Departamento di Cultura ta refleha nos dedicacion pa promove innovacion, expresion cultural y desaroyo sostenibel.” Arends a señala.

Derchlien Dijkhoff, senior product specialist di Aruba Tourism Authority (ATA) a expresa cu nan a cuminsa papia cu Go Cultura for di aña pasa pa loke ta trata Steelpan Proyect cu nan a haci durante Carnaval 70 unda nan a mira un potencial hopi grandi den e parti di cultura pero tambe creativo.

“Como organisacion encarga cu e pilar principal di economia, ATA ta enfoca riba desaroyo y tambe promocion di turismo pa Aruba. Pero tambe ta reconoce cu e aspecto cultural y creativo tin un papel crucial pa nos pais y pa nos identidad. Ta ofrece un oportunidad pa diversifica e destinacion y experiencia local como tambe turistico,” el a bisa.

Nan sosten pa Go Cultura, segun a indica no ta solamente un aliansa, pero esfuerso strategico a crece y fortifica industrianan cultural y creativo.

Arthur Loefstok ken ta fungi como presidente di Go Cultura Foundation a señala cu nan ta contento cu e 7 aña cu nan a caba di cumpli unda e trabao cu nan ta bin haciendo ta hopi importante pa e sector y tambe pa e isla, debi cu hopi biaha ta busca pa semper bay dilanti.

“Durante e 7 aña aki nos a boga pa e industria aki ta reconoci y pa nos por cuminsa na desaroy’e. E dianan largo cu nos a sinta haciendo nos research di pakico esaki mester ta vigente na Aruba, nos ta hopi convenci cu nos tur mester di dje, nos ta bibando den esey y continuamente nos como sernan creativo nos ta bibele y nos sa de que se trata ora cu algo no ta reconoci ainda. Mirando tur e otro paisnan cu ya caba tin desaroya esaki, bo ta wak con dilanti nan ta bay, cuanto incentivo nan tin, cuanto apoyo nan ta haya di diferente stakeholders y mi ta pone enfasis, pakico no na Aruba? A traves di e personanan cu nos lo bay tin na conferencia aki mi ta kere firmemente cu esnan cu tin e poder di haci cambio lo por siña un poco mas tambe,” Loefstok a declara.

Pa finalisa, a informa cu durante dos dia lo bay tin actividadnan, sesionnan y tambe presentacionnan di diferente oradornan internacional, manera: John Howkins, cu ta wordo considera como e “tata di e economia creativo”, ta un lider strategico den e area di creatividad y innovacion. Reconoci pa su bukinan influencial: “The Creative Economy” (2001), “Creative Ecologies” (2006) y “Invisible Work” (2020).

Felipe Buitrago Restrepo, un lider experto den e sector di Cultura y Economia Creativo y

Information & Communications Technology, cu mas di 22 aña di experiencia. Como ex-minister di Cultura di Colombia bao di ex-presidente Ivan Duque, e tin un rol crucial den maneho publico. Buitrago tambe ta e co-autor di “The Orange Economy: An Infinite Opportunity” y “Orange Economy: An Infinite Reality “ hunto cu ex-presidente Ivan Duque.

John King, ta e minister di Economia Creativo, Cultura y Deporte na Barbados desde aña 2018 bao di prome minister Mia Mottley. Su liderazgo y maneho a hunga un rol fundamental den e avance di e Industria Creativo di su pais, integrando arte, cultura y deporte den e economia nacional.

Clara Reyes, ta directora di e Departamento di Cultura di Ministerio di Educacion, Cultura, Hoben y Deporte na St. Maarten. Como un defensor prominente di cultura, artista, y educador, Reyes ta dedica na perserva cultura di Caribe cu su trabao den danza, teatro, y herencia cultural.

Elton Villarreal, ta un trainer internacional nativo di Curaçao, conoci pa su experticio den “Leadership Development” y tambe educacion experiencial.

Durante CreActivo 2024 tambe ta bay tin presentacion di oradornan local, entre otro: Arthur Loefstok y Edjean Semeleer di Fundacion Go Cultura, tambe Ronella Croes y Derchlien Dijkhoff di Aruba Tourism Authority, Mary-Ann Falconi Rasmijn di Impact Hub, Daniel Tecklenborg di CEDE Aruba cu lo enfoca riba e potencial di e industrianan aki pa transformacion social y Cherryldine Buckley di SMAC cu lo pone enfasis riba e impacto di Aruba su carnaval.