Durante su conferencia di prensa ayera mainta, Prome Minister a elabora ariba su biahe di trabao pa Hulanda. Un di e temanan cu el a toca durante su biaha ta Relacion Exterior y den esaki el a yega na palabracionnan cu Hulanda pa loke ta implementacion di dos tratado importante na Aruba.
Prome Minister a indica cu alrededor di e tema di Relacion Exterior tabatin hopi reunion riba e tereno aki y e meta ta pa fortifica e departamento di Relacion Exterior na Aruba cu sosten, apoyo y cu experticio.
Un tema hopi importante cu tabata riba mesa, el a resalta, ta e tema di e tratadonan internacional cu Aruba tambe ta parti di dje y cu Aruba mester implementa. “Den e caso aki a haci bon palabracion riba dos tratado cu nan ta bay yuda nos cune riba termino corto,” el a bisa.
E prome tratado cu Hulanda ta bay yuda Aruba cune riba termino corto ta e tratado di Istanbul. E mandatario a splica cu e tratado aki ta un tratado contra violencia contra hende muher y ta un tratado cu Aruba kier ta parti di dje. “Nos ta bay ratifik’e y implement’e,” el a indica.
E otro tratado cu a yega na palabracion riba dje ta e ‘Kinderontvoeringsverdrag’, cual ta e tratado contra secuestro di mucha. “Lamentablemente esaki ta algo cu ta pasa na Aruba, no hopi, pero cada caso ta di mas, cu un mayor despues di separacion ta coy un yiu, bay cune den exterior sin cu e otro mayor ta na altura of tin contacto cune. Esaki nan ta considera secuestro di mucha tambe y esey ta algo cu nos mester traha riba dje tambe,” el a enfatisa.
Prome Minister a remarca cu e tratado aki tambe ta uno cu Aruba tin cu ratifica y implementa y cu e palabracionnan acorda Hulanda ta bay yuda Aruba haci esaki riba termino cortico mirando cu no tin e cantidad di hende na Aruba pa haci tur e trabao. “Nan ta bay yuda nos cune y mi ta kere esey ta algo hopi bunita,” el a resalta.
