Recientemente Aruba Vocational Education en Training Institute (A-vet) y Techniek College Rotterdam (TCR) a firma un Memorandum of Understanding (MOU). E firmamento aki a tuma luga na ArubaHuis.

Na mes momento a firma un acuerdo entre A-vet y ArubaHuis pa ta partner den e proyecto aki. Despues di e firmamento Minister di Enseñansa, Ciencia y Desaroyo Sostenibel dr. Armando Rudy Lampe a manda den un discurso audiovisual su palabranan di sosten y pabien na A-vet y TCR.

Minister Plenipotenciario Guillfred Besaril na e ocasion aki a bisa cu e trainingnan ta haci cu e hobennan tin un vocacion y cu esaki por cambia nan bida. ‘E tin como contra aspecto no unicamente educacion, pero tambe e aspecto social y desaroyo. Nos a tuma nota cu hopi pais cu ta avansa den Europa y rond mundo tin como yabi principal educacion. Na Aruba pa añanan ta papia di “Life Long Learning”; pa educa nos hendenan y pa nan sigui educa nan mes, pero cu no tin e hermentnan necesario. Traves di e MOU cu a keda firma Aruba ta enrikece su mes cu un instituto cu ta pone como meta principal e parti vocacional di nos comunidad pa asina aki duna esunnan cu kier studia y siña un vocacion e preparacion necesario pa asina nan por integra nan mes den un forma practico riba nos mercado labora,’ segun Minister Plenipotenciario Besaril.

E mandatario a bisa cu Arubahuis lo ta un intermediario pa institutonan na Hulanda y A-vet.

Presidente di A-vet Gina Maduro a bisa cu e instituto ta uno priva y hopi importante na Aruba y cu ta bin cu un sistema di duna les completamente diferente. E MOU cu TCR a haci cu a adopta mas cu tres mil training curriculum. Tambe Maduro a bisa cu tur studiante cu caba nan training lo ricibi un diploma di TCR. Presidente di A-vet a ilustra cu e proyecto aki ta uno hopi innovativo. ‘Nos ta bin cu tecnologianan nobo y sistema nobo di educacion. Nos kier siña di Hulanda y ta p’esey nos a bishita diferente branch cu nos ta traha cu nan pa mira e metodo di duna les, e materialnan cu nan ta uza; tur ta hopi innovativo y sostenibel. Tecnologianan hopi avansa cu nos por haci uzo di nan,’ asina presidente di A-vet a bisa.

Sra. Maduro a bisa cu 2019 ta e fase di implementacion y cu fin di augustus A-vet lo por duna mas informacion y asina e pueblo di Aruba por tende mas kico A-vet por nifica pa nan.

Techniek College Rotterdam den nomber di su director Hendrik Stevens a bisa cu su instituto ta hopi honra cu A-vet a scoge pa TCR pa ta partner pa duna training y cursonan na Aruba. Esaki ta un oportunidad grandi pa TCR tin e posibilidad pa intercambia conocemento cu un otro instituto. Stevens: ‘Awor cu nos a firma e MOU, ta bin un plan di accion. Nos ta bay cuminsa chikito pa asina nos por organisa esaki na un manera sabi y tambe pa ehecuta esaki. Duna nos e tempo y espacio pa pone un fundeshi firme cu nos por construi riba dje pa e proximo añanan cu ta bin.’

Representante di Aruba na Union Europeo, Eddy Paris, di su banda a bisa cu el a trece e plan di A-vet caba bou atencion di e organisacion OCTA na Brusels pa busca fondonan Europeo pa e proyecto aki. Paris a bisa di ta mira posibilidadnan pa yega na fondonan Europeo.