WILLEMSTAD – E banco MCB lo cera cuentanan di Robbie Dos Santos y su grupo di compania, esaki ta e intencion final tras di e caso cual e banco a entama contra di nan. Segun e banco, e cuentanan bancario di un rifero tin ”apetit di riesgo”.

Durante di e tratamento di e caso, hues Pieter de Kort, a trata na haci su maximo esfuerso di compronde e consecuencianan di e decision di MCB. E causa di e decision ya ta conoci y comprendibel, pero awor kico t’ey pasa cu tur e miyonnan circulando diariamente den e mundo di loteria. E cen mester bay un caminda…segun e hues a argumenta. Segun Banco Maduro, MCB, sin nan acepta e cuentanan, banconan internacional lo cera nan porta y consecuentemente esaki t’ey afecta economia di Corsou.

Mientras corte civil ta trahando riba e veredicto pa anuncia 13 di maart proximo, corte penal na Corsou y na Hulanda no por bini cla den dos caso, unda cuentanan di banco y mashin di swipe na MCB, Banco Maduro, a wordo uza pa laba mucho mas miyon florin cu por wordo laba den benta di number na Corsou. Den uno di e casonan aki, e compania di accountant KPMG a yega na un deal cu Ministerio Publico pa exsoneracion penal. Ta trata di un investigacion cual a inicia oficialmente for di 6 di juli 2015, unda un grupo di comerciante na Corsou y na Hulanda a via Venezuela a logra laba riba 320 miyon dollar. E casonan a keda denomina como Troya na Corsou y Cymbal na Hulanda. Den Troya, cuentanan bancario di MCB hunto cu mashin nan di swipe di MCB a wordo uza pa laba un parti di e 320 miyon florin, for di cual autoridadnan ke laga confisca mas di 200 miyon na propiedad y activonan mobil for di e grupo di sospechoso.

Cymbal y Troya, a tuma mas di 4 aña pa yega corte, debi na e structura complica y diferente trayecto di cen. Tabata riba 6 di juli 2015 cu por fin husticia a opta pa inicia e ristamento y investigacion fisico den e caso. Riba e dia en kestion, team di recherche di hunto cu Hulandesnan cu ta forma Combi team a realisa varios entrada hudicial aki na Corsou. Combi team ta autoridadnan Hulandes y tambe recherchenan cu ta forma parti di FIOD team  esta e parti di Fiscal ora ta bay tocante di investigacion di placa. E operacion tabata contra di personanan cu tabata laba placa na gran escala procedente di crimennan, fraude, falsificacion di documento y tambe cambiamento di placa sin tabatin e permit necesario pa por a haci esakinan. Durante investigacion a bin resulta cu cuentanan bancario na MCB tabata wordo utilisa pa laba placa.