Ayera mainta den un hotel conoci a tuma luga e prome reunion informativo entre sector empresarial di e islanan di Aruba y Corsou hunto cu Fedecamaras di Venezuela pa asina papia di puntonan di interes entre e participantenan pa loke ta trata apertura di frontera entre e islanan y Venezuela.

Entre e instancianan presente tabata Aruba Trade & Industry Association (ATIA), Comerciantenan Uni, San Nicolas Business Association (SNBA), Aruba Time Share Association (ATSA), Camara di Comercio di Aruba, Camara di Comercio di Corsou, Fedecamaras di Venezuela, entre otro.

E prome reunion aki cu a wordo organisa pa Camara di Comercio di La Vela di Coro. Fedecamaras y ATIA tabatin e obhetivo di trece dilanti puntonan di interes pa e islanan di Aruba, Corsou y tambe Venezuela, pa asina wak den ki punto nan ta aworaki tocante e proceso di apertura di frontera na unda nan a sigura cu nan tin planea reuni un biaha mas despues di e reunion entre gobiernonan dia 30 di januari na Corsou.

Gobierno y sector priva di Corsou ta 100% tras di habrimento di frontera

Billy Jonckhedd presidente di Camara di Comercio di Corsou a expresa cu for di nan punto di bista e reunion aki “ta masha importante pasobra pa basta tempo caba nos kier mira e fronteranan habri entre Corsou, Aruba y Venezuela,” el a bisa.

E motibo di mas principal segun su opinion ta pa comercio y pa e comunidad por haya y gosa di e prijsnan di antes, e productonan di Venezuela “awe nos a wordo reuni cu Fedecamaras cu ta e Camara di Comercio di Venezuela pa nos sinta discuti kico ta e cosnan cu nos por cuminsa prepara pe, nos na Corsou ta 100% tras di habrimento di frontera pa loke ta trata Gobierno y sector priva, na fin di luna ta bay tin un reunion na Corsou pa papia di e parti tecnico entre e gobiernonan di e islanan conhuntamente cu Venezuela y Hulanda, pa loke nos ta espera cu ta bay mira e urgencia cu nos tin pa habri e frontera lo mas lihe posibel”, el a sigura.

Asina mes, el a afirma cu lo ta un bon idea si asociacionnan empresarial por wordo invita pa e reunion ey pa asina tin un representante di comercio “mi ta kere cu e input di comercio ta hopi importante den tur e realidad, ta hopi bes nos ta lubida e parti di economia y esey ta e parti mas importante pa nos hendenan di e dos isla”, el a bisa.

Na Corsou, manera el a sigura, “bo tin un linea ta core” na unda el a indica cu Corsou tambe ta exportado pa Venezuela y ora frontera a cera tur e negoshi ey a bay perdi “ta basta negoshi ta wordo haci, nos tin hopi aña ta traha cu Venezuela den area di comercio y cultura tambe, kiermen a bira tempo pa soluciona y nos gobierno a bisa tambe cu nan ta tras di habrimento di frontera.”

Ademas, el a sigura cu “tin par di hende cu ta pensa riba e parti di inmigracion ilegal y nos no ta di acuerdo cu esey, debi cu aworaki pa bo bin for di Venezuela bo mester visa y e parti ilegal ta tumando luga aworaki cu frontera cera mes, cu e visa implementa lo tin hopi mas control pa hendenan cu ta bin na nos islanan.”

Camara di Comercio di Aruba ta urgi pa soluciona e situacion aki

Di su parti, presidente di Camara di Comercio di Aruba, Monica Kock, a expresa cu nan a wordo invita pa Fedecamaras di Venezuela unda a yega di splica con e situacion ta na e pais bisiña pa loke ta trata economia, e dolarisacion cu ta existi den tempo aki na e pais ey y otro topiconan cu ta hopi relevante pa Aruba.

Den esaki, Kock a splica cu for di aña pasa Camara di Comercio a vocifera cu nan ta para positivo pa habri e frontera “y nos sa cu esaki ta algo entre gobiernonan , cu nan ta trahando riba dje pero nos lo kier urgi pa soluciona e situacion aki riba un termino, pasobra nos ta di opinion cu no solamente comercio pero e pueblo en general lo probecha si e frontera ta habri, por ehemplo, e fleta cu tin cu paga pa un barco bin cu productonan di Venezuela pa Aruba, e distancia ta diferente cu Miami y Santo Domingo y tambe e gastonan den e parti ey di transportacion lo ta hopi mas abou y esey ta bay beneficia full e pueblo cu productonan mas economico,”el a menciona.

Fedecamaras di Venezuela ta spera cu den e reunion entre gobiernonan lo sali diferente solucion

Adan Celis vice-prome presidente di Fedecamaras di Venezuela a señala cu esaki ta bay trece beneficio tanto pa produccion di empleo na Venezuela ora e companianan lo reactiva bek cu exportacion y di otro banda, un beneficio pa e ciudadanonan di Aruba cu ta bay haya un proveedor mas di productonan cu miho prijsnan “nos ta trahando den busca con nos por apoya, con nos ta sensibilisa y con busca pa e reunion tecnico di 30 di januari entre e gobiernonan na Corsou lo sali e diferente solucion pa resolve e problemanan cu por existi y tambe trece dilanti e aspectonan tecnico pa nos por logra activa e comercio entre e islanan”, Celis a señala.

Despues di Merca, Venezuela tabata e di dos pais unda turistanan tabata bin

Rondel Heyliger miembro di directiva di San Nicolas Business Association a comenta cu e reunion a bay bon cu basta informacion, “nos ta wak e parti positivo di dje, si nos habri frontera cu Venezuela nos por haya nos fruta y berdura, por ehemplo, mas barata. Semper nos a importa for di Venezuela y aworaki cu nos no ta haciendo esey, nos ta pagando basta pa esey,” Heyliger a menciona.

Tambe, el a sigura cu prome cu frontera a cera na 2018, despues di Merca “Venezuela tabata nos di dos pais unda turistanan tabata bin y nos no tin esey mas”, el a bisa.

Venezuela tabata un partner importante pa importacion y exportacion

Herrick Henriquez director di ATIA a declara cu den reunion aki nan a haya informacion di e situacion con Venezuela ta na e momentonan aki y con esey lo por beneficia of yuda Aruba den futuro, “awor nos ta bay bek na e borchi pa discuti ki posicion nos ta bay tuma pa cu un reapertura di fronteranan, pa nos esaki ta e prome stap pasobra ta bay tin mas reunion y pa ami ta hopi positivo. Den pasado Venezuela tabata un partner importante di Aruba specialmente den comercio di importacion y exportacion y ta importante pa den futuro tambe nos tin un partnership bek cu Venezuela tanten cosnan keda positivo,” Henriquez a declara.

Ocupacion di Time Share a baha den cinco aña aki

Luigi Heredia presidente di Aruba Time Share Association (ATSA) a declara cu esaki ta algo positivo pa ATSA pa motibo cu tin hopi miembresia cu ta di personanan di nacionalidad Venezolano y for di dia cu frontera a cera e miembronan no por bin disfruta manera antes, “nan por bin for di Panama, Republica Dominicana of Miami pero esey ta involucra hopi mas gasto pa un famia, nos ta wak cu den nos miembresia cu a wordo cumpra 20 of 25 aña pasa nos ta perdiendo un partner eynan, nos ta perdiendo e mercado ey.”

Nan a ripara tambe cu den lunanan di augustus, september y october pa nan como ATSA esey ta e temporada di turistanan Latino y ocupacion a baha den ultimo cinco, “nos ta support e idea pa frontera habri pero nos tin cu wak e parti di siguridad tambe”, Heredia a finalisa.