Fase di test ‘Beta’ a cuminsa pa un app di pisca yama StaBlu. E app tin potencial di transforma industria di piscamento den Caribe, esey ta e veredicto di Director di St. Eustatius Foundation (SEF), Dr. Teresa Leslie, kende ta facilitando e innovacion aki, lidera pa Union Europeo.
E app ta diseña pa vincula e catch diario di pisca directamente na demanda di consumidor den mercado local. “Ta un maneho exitoso na Scandinavia”, Leslie a bisa. “Nos fase di test a trece hunto un total di 15 piscado y cliente. E ta facil pa uza, y nos lo lansa e sistema completo prome cu september e aña aki.”
Tradicionalmente, e catch local di pisca y lobster ta bendi band’i e haf, of manda na St. Maarten of St. Barths riba boto. “Nos proximo paso ta pa involucra piscadonan den nos awa y expande e base di cliente, pa asina por ehempel restaurant local por bestel nan catch di dia”, Leslie a bisa.
Segun e, e app no solamente lo stimula abastecemento y demanda local, sino tambe demarca practicanan sostenibel di piscamento. “Cambio climatico ta poniendo presion riba nos ocean, y esaki tin un impacto riba bida marino. Piscadonan mester bira e administrado di nan propio lama.”
Leslie a bisa cu e app por graba informacion activamente riba e tipo y cantidad di pisca cu ta bende, cual lo yuda den planifica piscamento sostenibel. Mientras ta lansando e app den Caribe oriental, ta anticipa cu mercadonan grandi manera Trinidad, Barbados y Jamaica lo adopta e app.
Mientras SEF ta manehando e proyecto, e software pa e app di pisca a wordo crea pa John Sandiford, naci na St. Maarten, un diseñado di experiencia di usuario (UX) y doño di Antonio Media BV na Eindhoven.
“Consumido lo beneficia sigur”, segun Sandiford. “Corant y pisca tin e bida comercial mas cortico di tur producto. Chef Caribense ta cushina excelente, sinembargo, pisca den container of avion nunca ta mesun fresco cu pisca di awanan local.”
Partidonan interesa di forma parti di e etapa di test Beta y ta involucra den piscamento por tuma contacto cu SEF riba ateux.foundation@gmail.com.
