A.T.A.: Ta reuni cu ekipo y agencia di Norte America riba desaroyo y strategia actual y pa futuro

Aruba Tourism Authority (A.T.A) a tene un siman di reunion extensivo y productivo referente strategia pa 2024, 2025 y despues. E aña aki gran parti di e reunion a tene cuenta cu A.T.A. su papel den cambionan integral cu mester introduci of accionnan cu mester ahusta pa asina logra mas di e balansa entre desaroyo economico, experiencia di calidad pa e bishitante, proteccion di naturalesa y medio ambiente, y calidad di bida di nos residentenan – e Aruba dushi pa biba.

E mercado Norte Americano ta di sumo importancia y por comparti lo siguiente pa cu su desaroyo; te cu mei di e aña aki e mercado a conoce un resultado positivo di 17.0% adicional, y ta anticipa cu e lo cera e aña cu un resultado positivo di 13% adicional compara cu 2023. Un demanda sumamente fuerte y un mercado cu un patronchi di gasto sumamente halto.

A reuni cu agencianan Norte Americano, esta Deep Focus y Zeno cu ta dedica na promociona Aruba efectivamente den e mercado respectivo. A elabora riba e strategia di comunicacion, A.T.A. su plan di maneho pa cu 2025 te cu 2035 – cual ta wordo formula actualmente –, a elabora riba e encuesta di ‘Local Sentiment’, actualisacion di Aruba Promise/ Mi compromiso y Code of Conduct, y desafio y oportunidadnan cu ta inclui Luxury Tourism, Wellness, y Over-tourism. Tambe a conta cu presencia di representante di Aruba Conservation Foundation cu a comunica e transicion di e fundacion na un manera exitoso. Un socio clave den e transicion cu A.T.A. tambe kier logra, dunando mas realse na nos naturaleza y medio ambiente, entre otro.

E mercado di Norte America ta keda un influencia grandi den e tipo di bishitante cu Aruba ta ricibi. E enfoke pa 2025 ta sigui ta basa riba e direccion desea pa A.T.A. pa atrae e bishitante di High Value – Low Impact, cu ta inclui bishitantenan cu ta alinea cu e comportacion segun norma y balor di e isla, cu respet pa e hende, naturalesa, creencia, y cultura di Aruba. E aspecto di ‘High Value’ ta keda importante y ta encera entre otro atrae esnan cu ta goza di un entrada anual relativamente mas halto. Esaki A.T.A. ta midi y tambe ta midi kico e bishitante Mericano – mescos cu ta haci pa otro mercado – ta finalmente laga atras den nos economia tambe. Bisando esaki, banda di midi e satisfaccion di nos bishitantenan, A.T.A. a bin ta pone mas atencion na midi e sentimentonan di nos comunidad local. Locual ta birando mas y mas un parti integral di A.T.A. su strategia ta e dicho ‘Un Aruba Dushi pa Biba ta un Aruba Dushi pa bishita’. Esaki no ta un aspecto nobo, pero cu sigur a bin ta haya hopi atencion y lo sigui na ricibi aun mas hopi! Aki ta caminda cu ta pone hopi mas enfasis riba balansa e desaroyo turistico hunto cu e Aruba dushi pa biba!