Aruba tin potencial pa bira un lider na nivel mundial pa loke ta e tendencia nobo di e asina yama ’Sharing Economy’. Esaki ta conclusion di April Rinne, kende ta un autoridad den e materia y un di e oradornan na e Happiness 360 Conference cu lo bay tuma luga aki na Aruba dia 13 y 14 di september binidero.
‘Sharing Economy’ ta un modelo economico cu ta caracterisa su mes pa ‘uzo comparti di recursonan’ cu ‘no ta wordo utilisa optimalmente’. E mundo di ‘Sharing Economy’ ta mara di cerca cu e mundo / tecnologia digital y e fenomeno di ‘comparti’ ta stimula interaccion entre hende y pues ta stimula desaroyo di relacionnan entre hendenan. Den mundo di turismo esaki ta manifesta su mes den entre otro turistanan optando pa keda entre otro na ‘vacation homes’, condominionan, casnan priva na luga di na un hotel, haciendo nan reservacionnan por ehempel via AirBnb. Mester tene cuenta cu e fenomeno a bin ta gana tereno pero no ta uno nobo, mester pensa aki riba ‘time share’ cu ta basa riba e modelo aki. Akinan na Aruba esaki ta cay bao di e termino ‘otro’ acomodacionnan, ‘otro’ fuera di hotel y timeshare. Ultimo añanan por nota cu e modalidad turistico aki ta birando mas y mas popular. Recientemente Aruba Tourism Authority a invita esunnan cu ta huur propiedad, partner, manera Camara di Comercio, AHATA, ATSA, Banco Central, y aparatonan gubernamental, na diferente sesionnan pa trata e tema di ‘Sharing Economy’. Durante cada sesion por a participa den un sesion interactivo hunto cu e orador invita tabata April Rinne, kende ta un experto riba e tereno di ‘Sharing Economy’. Durante e sesion aki, tur partido a sinta hunto pa intercambia di idea. Ademas April Rinne a reuni cu Minister di Turismo Sr. Otmar Oduber hunto cu e ekipo di A.T.A., na unda a profundisa riba e maneho debido cu mester introduci pa cu e fenomeno aki.
Rinne ta bisa cu el a experiencia un recepcion hopi caluroso y cu mente habri aki na Aruba. “Ta inspira mi hopi pa mira con Ministerio di Turismo, A.T.A. y otro partner ta delibera riba ‘Sharing Economy’ y e futuro di turismo di nan pais.” Rinne ta bisa cu el a yega di traha cu hopi pais riba tereno di ‘Sharing Economy’. “No ta usual pa mira un organisacion turistico cu ta asina progresivo, innovativo y pro activo den purba di compronde ’Sharing Economy’ y con pa lag’e funciona apropiadamente den e industria turistico. Di un banda esey no ta sorprende mi, mirando e rol cu turismo ta hunga den Aruba su economia. Pero e manera pro activo con Ministerio di Turismo y A.T.A. ta trata e topico ta excepcional. Ainda falta pa traduci bon ideanan den accionnan concreto, pero mi ta mira masha hopi potencial mes pa Aruba no solamente bira un lider pa loke ta ‘Sharing Economy’ den region di Caribe pero kisas tambe pa henter mundo.”
Aña pasa un total di 33% di bishitantenan a keda na un acomodacion categorisa como un ‘otro’ tipo di acomodacion. Aki e mercado di Venezuela a hunga un papel grandi, pero mester tene cuenta cu mercadonan cu ta opta pa e tipo di acomodacion aki tambe ta; Hulanda, Colombia, y
Tambe Merca cu a bin ta crece entrante e aña aki. Te cu juli di e aña aki un total di 29% di bishitantenan pa nos isla a keda na un ‘otro’ tipo di acomodacion. Segun Rinne, tin poco pais na mundo den cual industria turistico ta hunga un rol asina central y esey ta haci nospais unico. E ta bisa cu ta importante, no solamente pa keda trata e tema di ‘Sharing Economy’ na un manera responsabel, pero tambe pa pensa na un manera strategico riba con e modelo aki cu ta birando mas y mas importante por sirbi e
Industria turistico y nos pais. Aruba riba su mes ta un mercado chikito compara cu otro destinacionnan turistico, pero Rinne ta enfatisa cu akinan no ta cuestion di tin e mercado mas grandi pero esun cu e ideanan mas creativo cu ta yuda un pais prospera.
Happiness 360 Conference ta un conferencia di suma importancia cu participacion di entre otro United Nations World Tourism Organization y Florida Caribbean Cruise Association. Tema central cu lo wordo discuti ta e factor di felicidad como parti di e experiencia turistico di un pais. Tambe lo bay trata e ultimo tendencia den mundo di turismo. Ademas Aruba como anfitrion lo haya amplio espacio pa showcase arte y cultura local y suposicion como lider den innovacion turistico den Caribe. April Rinne lo ta un di e oradornan durante e conferencia aki.
