Na 2016 a confronta diferente reto den mercado turistico di Merca, pa cual motibo A.T.A. ta inverti 2 miyon florin adicional na promocion na Merca. Relaciona cu esaki, a ricibi e siguiente relato di A.T.A.
E mercado di Merca a crece cu 8% aña pasa y ta anticipa cu e lo por cera 2016 cu un crecemento di 1.2%. A.T.A. a bin ta pone mas enfasis riba e mercado Mericano debi na diferente reto cu a asota e mercado y e region completo di Caribe e aña aki y cu simplemente a y ta rekeri empuhe adicional.
Un winter suave na Merca durante e prome lunanan di e aña 2016 na e parti Noordoost di Merca -e mercado principal pa Caribe y Aruba- a afecta e comportacion di e turista Mericano y a conduci na menos turista for di Merca. Tambe e impacto di ZIKA y eleccionnan presidencial no a yuda. Fuera di esey otro mercadonan cu presionnan economico tambe a confronta reto e aña aki,esakinan ta inclui Brasil y Canada. Fuera di esaki, Aruba en particular ta sigui experencia e volatilidad di e Mercado Venezolano.
Tambe mester menciona un reto adicional pa e Mercado di Merca unda cu e aña aki a conoce un reduccion di 4% di capacidad (airlift capacity)procedente di Merca. Esaki ta debi na e clima economico Mericano y ahustacionnan den mundo di aviacion Mericano. Esaki a conduci na un reduccion di operacion di United Airlines (Chicago, Washington, D.C. y Houston) y American Airlines (Miami y Philadelphia), y cancelacion di 2 vuelo pa siman di Southwest Airlines durante di cierto lunanan e aña aki. No obstante di e reduccion aki, Aruba su grado di ocupacion riba e vuelonan ta keda stabiel y halto.
Crecemento di 9.8% den capacidad aereo for di Merca durante prome kwartaal di 2017
Pa temporada halto 2017, esta prome kwartaal di 2017, Aruba ta mira crecemento fuerte den capacidad aereo y pues oportunidadnan pa eleva e Mercado. Como meta pa 2017 a fiha un crecemento di 5% for di Merca y A.T.A. kier sigura cu e aña ta cuminsa –y continua– na un manera fuerte. Ta pa e motibo aki ta inverti un montante adicional di Afl. 2 miyon durante lunanan di november y december e aña aki. Esaki banda di Afl. 2 miyon adicional cu a inverti durante e aña caba. Ademas, A.T.A. conhuntamente cu JetBlue ta lansa un campaña promocional pa asina promove e ruta nobo di Fort Lauderdale – Aruba, cual ta inicia januari.
Startegia di promocion Mericano fortifica
Fondonan di Afl. 2 miyon adicional lo enfoca riba 3 mercado, esta New York, Boston y Fort Lauderdale. Mita di e presupuesto lo bay na publicidad tradicional (TV, print, radio) y e otro mita lo bay na promocion y contenido pa mercadeo online (p.e. TravelZoo, TripAdvisor, Adara). E ‘boost’ promocional aki ta pa energetisa e fluho di pasahero pa comienso di 2017, y unda por pa temporada di fin di aña tambe.
Aruba Tourism Authority ta sigui inverti den mercadeo y ultimo tendencianan di promocion digital rond mundo. Tambe mester delinea cu continuamente ta inverti den relacionnan cu partnernan strategico manera aerolineanan y operadornan Mericano, kendenan ta referi na nan partnership cu Aruba varios biaha como uno di ‘gold standard’.
