Ta bay inclui un total di 1500 e estudio
Oficina di Turismo (A.T.A.) actualmente ta conduciendo un encuesta amplio pa evalua e sentimento di bishitantenan. E encuesta tin como meta pa midi e sentimento di bishitantenan, y tambe pa obtene un miho bista tocante nan experencia riba nos isla y si esaki ta cuadra cu nan expectativa.
Un total di 1500 turista lo wordo acerca pa studiantenan di Universidad di Aruba pa participa den e encuesta cu ta tumando luga na 14 diferente sitio y punto di atraccion rond di nos isla, entre otro na California Lighthouse, Alto Vista, Bushiribana, Casibari, Ayo Rock Formation, Quadirikiri, Fontein y na diferente di nos beachnan. E encuesta lo conclui dia 13 di november binidero.
Un di e metanan principal di e estudio aki ta pa comprende con un multitud di hende por influencia of afecta e experiencia di bishitante. Bishitantenan lo wordo puntra tocante nan percepcion di y sentimento pa cu cierto cantidad di multitud y con esaki ta influencia nan experencia na e sitio.
E resultado di e estudio aki lo duna un miho bista riba kico bishitantenan ta spera durante nan bishita na Aruba y tocante nan experiencia en general. E dato aki lo yuda A.T.A. pa mehora e experiencia turistico riba nos isla.
E resultado di e estudio lo wordo presenta na luna di december. Pa algun di e sitionan, A.T.A. a conduci e mesun estudio na 2018, pues pa e sitionan aki por haci un comparacion entre e feedback. . A.T.A. ta contento di scucha e bos di nos bishitantenan y uza nan feedback pa haci Aruba un destinacion aun mas atractivo.
