Entre december 2023 cu maart 2024, Aruba Tourism Authority (A.T.A) a conduci un estudio encuanto e mercado di ‘Luxury Cruise’. A encarga PFK Hospitality pa cu e analisis aki. E estudio a elabora riba tendencia y demanda di e industria cu ta pronostica un crecemento for di 6.08 biyon na aña 2022 pa 14.13 biyon na aña 2029.

Un pronostico di crecemento anual di 12.8% cu ta subraya e demanda pa un experiencia personalisa y di balor halto cual ta señala un cambio pivotal den e industria aki cu un shift pa luho y exclusividad.

Un crecemento cu ta alinea na indicadornan economico amplio di rikesa global y expansion di consumidor afluente cu ta impulsa e demanda di un producto y experiencia di luho. Den e ultimo añanan, e mercado di ‘Luxury Cruise’ a cuminsa mira un cambio den demografia, pasando di e Baby Boomers, cu ta priorisa comodidad, luho y experiencia cultural, pa un combinacion significativo di e Generacion X y e Millennials di mas edad cu ta un segmento nobo cu ta wordo atrae pa medio di un experiencia unico y captivante.

Ora ta trata e panorama competitivo, a analisa diferente isla den Caribe manera Bahamas, St. Barts, Barbados, y St. Maarten cu ta ofrece producto di sea paisahenan di luho y bunita, cu ta rico den experiencia cultural y vibrante, un waf moderno cu facilidadnan eficiente, y mas, pero ta falta kizas un of e otro pa por completa e experiencia completo pa e tipo di bishitante aki.

Ta di menciona cu A.T.A. ta sigui pone enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, ‘Proteccion y Preservacion di Naturalesa & Medio Ambiente’, y ‘Contribucion Economico na nos isla’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi, teniendo na cuenta e 4 pilarnan como tambe capacidad di carga.

Informacion di e estudio y resultadonan di Juni 2024 ta awor obtenibel.

Actualisacion den e industria di turismo:

Volumen (“stayover”) ta crece cu 20.7% den juni 2024 compara cu juni 2023

Conforme e demanda por bai mira tambe cu e aerolineanan lo sigui expande capacidad y asina permitiendo nos captura e demanda. Te cu juni 2024, Aruba a ricibi un total di 122,573 bishitante “stayover”, esaki ta un crecemento di 20.7%, compara cu te cu juni 2023, unda a ricibi 101,518 bishitante “stayover”.

Averahe di patronchi di gasto pa cada bishitante den e prome kwartaal di 2024

Visa Credit card su averahe den gasto pa cada cardholder a yega na un suma di $666 den 2024. Si mira entrada general di VISA por nota un crecemento di 19.4% si compara cu e prome kwartaal di 2023. Un total di $185 miyon a wordo gasta utilisando VISA Credit Card durante di nan estadia ariba nos isla.

Mercadonan y categorianan di acomodacion

Den juni 2024, 79.6% di e total di e bishitantenan “stayover” pa Aruba a bishita for di Norte America, 3.5% a bishita for di Europa, 14.5% a bishita for di Latino America y 2.3% tawata procedente di otro partinan di mundo.

Mirando e categorianan di acomodacion, den juni 2024 26.8% di bishitante a keda den hotelnan European Plan, 15.7% a keda den hotelnan All-Inclusive, 24.6% a keda den Timeshare, y 33% a keda den otro tipo di acomodacion, conoci tambe como short-term vacation rentals

(STVR).short-term vacation rentals

A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera.

Den 2023, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo.

Si compara juni 2024 cu juni 2023 por wak cu e ocupacion averahe di e acomodacionnan aki a subi cu 9.8 punto di porcentahe, for di un averahe di 42.4% na juni 2023 pa un averahe di 52.2% na juni 2024.

Den caso di entrada, si compara juni 2023 cu juni 2024 por wak cu e categoria a genera un crecemento den entrada di 20.7%.

2024 (Year to Date)

Te cu juni 2024, Aruba a ricibi un total di 737,691 bishitante “stayover”, esaki ta un crecemento di 19% compara te cu juni 2023, unda a ricibi 619,719 bishitante “stayover”. Ora ta yega na lider den mercado, te cu juni 2024, 81.6% di e bishitantenan ta di Norte America, 4.5% ta di Europa, 11.6% ta di Latino America, y 2.3% tawata procedente di otro partinan di mundo.