A.T.A. conhuntamente cu Ministerio di Turismo, DOW y DIP a inicia e proyecto di embeyecemento di e trapi na Rodger’s Beach. For di inicio e intencion tawata pa e trapi aki ser embeyeci cu e arte di mozaik.
E idea tras di esaki ta pa sigui haci uzo di arte pa enfoca elementonan importante di diferente area di Aruba, y na mes momento crea atraccionnan ‘instagrammable’ pa nos bishitantenan. Mirando cu e area di Sero Colorado ta anexa na Parke Marino, a pidi DNM y FPNA pa duna nan aporte riba e especienan cu ta relevante pa e area pa asina por inclui esakinan den e diseño.
A encarga ‘Pure Aruba Events Foundation’ pa e proyecto aki, unda cu artistanan internacional; Isidora Paz y Margarita Venegas conhuntamente cu 12 artista local lo uza nan creatividad, basa riba nos flora y fauna den e area. E artistanan local ta Monique Palm, Omaira Silva, Rochelin de Cuba, Irman Golden, Angie Brown, Merveline Geerman, Mike Geerman, Irma Gorden, Roberto Brown, Rina Lacle, Jolanda Hagelen y Lyanne Monnikhof. Esaki ta un bunita oportunidad pa nos mesun artistanan hunto cu Isidora colabora y sigur tambe siña for di otro.
E diseño di e mozaik lo ilustra e cuido di naturalesa como tambe e mundo marino cual ta puntonan di concientisacion pa e area di Sero Colorado. E trapi lo ta sera pa arma e ekipo, mientras e proyecto mes lo ser ehecuta na un tayer priva. Ta premira cu lo cuminsa asambla e mozaiknan desde 4 di November, 2022 y esaki lo tin un duracion di un siman.
Como recordatorio e trapi na Rodgers Beach ta publico, pues ta spera cu na momento cu e embeyecemento keda finalisa, tanto nos mesun hendenan como nos bishitantenan lo haci uzo di dje y conserva su cuido.
A.T.A. ta sostene y para tras di e proyecto aki paso e ta alinea cu e strategia di sostene San Nicolas y tambe e area di nos playanan, pues lo sigui inverti den e mantencion y embeyecemento di esakinan.
