Ayera mainta Aruba Tourism Authority (ATA) a ofrece un breakfast na medionan di prensa local pa asina duna un splicacion di kico ta encera e plannan pa ‘Turismo 2023’, unda nan ta premira cu ta bay cera e aña aki cu un grado di recuperacion di 117% compara cu 2019.

Ronella Croes, CEO di ATA, a splica cu despues di pandemia Covid-19 Aruba ta un di e paisnan cu a recupera mas lihe den region Caribense despues di Republica Dominicana segun cifranan di United Nations World Tourism Organization y ta acentua e grado di recuperacion y e rapidez.

Di loke ta trata e factornan cu a haci diferencia pa Aruba, el a señala cu strategia y maneho di Covid-19 a duna un bon resultado. Esey tabata e diferente strategia pero mester subraya cu a duna un resultado positivo unda cu na 2020 entre otro, Aruba tabata un di e prome destinacion cu tabata habri pa Merca: “tabatin hopi preocupacion, habri of no habri pa Merca y el a resulta exitosamente, esey ta un ehempel di un maneho integral.”

Un otro punto cu ta diferencial, Croes a bisa cu Aruba tin A.T.A., cu ta un organisacion riba su mes pero e modelo di maneho di turismo di Aruba pa medio di A.T.A. ta inclui entre otro, pa ley, cu A.T.A. ta posee un fondo di emergencia y durante Covid-19 nan por a usa e fondo aki “ora cu otronan kisas no tabatin e modo financiero pa a sali pafo caba y haci cosnan diferente, nos por a haci uso di esaki.”

Exito di turismo ta wordo midi a base di cuanto entrada Aruba a haya pa medio di turismo, e volumen ta un factor cu ta pusha y esey ta importante manera Croes a sigura, pero ora ta papia cuanto placa y cuanto entrada a wordo genera, e ora ta papia di Tourism Receipts na unda cu esaki pa nan ta e indicador principal di si turismo ta moviendo na beneficio di e pais of no.

Nan tarea como A.T.A. ta pa yuda influencia subi e Tourism Receipts y esey ta den maneho nacional. Pa aña 2022 nan a pone un grado di recuperacion pa e Tourism Receipts di 95% y nan ta premira cu nan ta bay cera aña cu un grado di recuperacion di 117% compara cu 2019.

Tourism Receipts ta e entrada directo cu turismo ta genera. Banda di esey, turismo tin su impacto indirecto: otronan cu ta depende si no tin turismo, otro companianan y otro tipo di industrianan y economia no por sigui mesun rapido.

Tin 4 indicador cu A.T.A. ta haci uso di dje, conforme maneho nacional, esaki ta: e cantidad di bishitante stay over midi door di A.T.A., e Tourism Receipts cu ta wordo midi door di Banco Central, e RevPAR di hotelnan cu ta wordo midi door di AHATA y e cantidad di bishitante crucero cu ta wordo midi door di APA. A.T.A. ta midi ‘hopi’ otro indicador, pero e 4 aki ta aparece como meta riba nivel nacional.

Dos di e 4 indicador aki ta enfoca riba cantidad di bishitante mientras e otro dos ta enfoca riba entrada, esta e entrada cu ta wordo genera pa cada camber di hotel como tambe entrada cu turismo ta trece pa nos economia.

Tarea di A.T.A.: Influencia Tourism Receipts den linea cu un desaroyo duradero

Tarea principal di A.T.A. ta keda paden su afan di kico e por haci, influencia subida di e Tourism Receipts, y genera mas contribucion pa nos economia. Ta influencia esaki di 4 manera, tanto den area di mercadeo como den area di producto:

  • Incrementa e demanda pa Aruba a traves di mercadeo efectivo
  • Intensifica e enfoke di Aruba su mercadeo pa asina atrae bishitantenan nobo di balor halto
  • Facilita y mehora experiencianan unico pa incrementa e cantidad di placa cu bishitantenan ta gasta na Aruba
  • Incrementa e calidad di Aruba su producto turistico y mehora e balor y retorno cu ta ricibi di turismo.

Tanto bal A.T.A. genera entrada y esaki no sosode na un manera duradero. 

Influencia e Tourism Receipts mester wordo haci a base di e strategia integral di desaroyo turistico categorisa como e modelo di “High Value Low Impact Tourism Growth Model”. Mientras cu e Tourism Receipts ta ‘E’ driver di nos economia, mester tene presente cu A.T.A. ta boga pa un desaroyo duradero, unda cu e desaroyo economico aki mester bay man den man cu otro componente di e “High Value Low Impact Tourism Growth Model”, pues entre otro un bon calidad di bida pa nos comunidad, cuido y proteccion di nos naturalesa y medio ambiente y un bon experiencia pa nos bishitantenan.

A.T.A. ta purba di influencia e desaroyo aki y ta haci cierto inversionnan conforme su “scope” legal y ta purba di influencia y lobby pa otro aspectonan pa asina pusha pa e desaroyo duradero.

Na final di dia no ta tur cos ta den man di A.T.A.. Turismo ta un responsabilidad colectivo, pues di un y tur incluso varios otro cu ta den posicionnan clave di tuma e decisionnan corecto. Nos tarea primordial ta keda: Sigura cu turismo ta bay bon y cu e entrada ta wordo genera.

Y aki nos lo keda pusha pa e nocion cu ‘si’ esaki no cana e caminda di un desaroyo duradero, e lo por tin impacto negativo riba nos calidad di bida, como tambe nos medio ambiente, naturalesa, y e experiencia cu ta brinda bishitantenan y na su turno esaki por tin impacto negativo riba e mesun desaroyo economico. Pues tur e componentenan aki mester ta den un balansa. Esey ta un desaroyo turistico duradero.