Oficina di Turismo di Aruba (A.T.A.) hunto cu Departamento di Salud Publico (D.V.G.), Ministerio di Salubridad y socionan clave den e industria turistico ta presenta e ‘Aruba Health & Happiness Code (HH Code)’. E Seyo aki ta dirigi riba higiena y preparacionnan pa cu COVID-19.
E meta tras di e programa aki ta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba. Aruba Health & Happiness Code (HH Code) lo cualifica Aruba como un destinacion higienico cu ta cumpli cu proceduranan esencial y estableci pa asina limita e transmision di un enfermedad. Registracion ta mandatorio.
Aruba, manera mundo completo, actualmente ta adaptando rapidamente na locual ta wordo yama e ‘normal nobo’. Como parti di e preparacionnan pa cu e reapertura di nos fronteranan, Aruba mester evoluciona como destino turistico pa asina por ta miho prepara pa sigui sirbi nos bishitantenan como tambe e comunidad di Aruba. Pa e motibo aki, e Aruba Health & Happiness Code (HH Code) a wordo crea. E protocol y medidanan inclui den e Aruba Health & Happiness Code (HH Code) ta tene den consideracion e diferente proveedornan cu cual bishitantenan lo por tin contacto durante nan bishita. Esaki a wordo haci door di cubri tur punto di contacto den e cadena di suministro.
A.T.A. y D.V.G. a yega na un acuerdo cu e Aruba Health & Happiness Code (HH Code) lo consisti di dos fase. E prome fase ta enfoca riba e hecho cu cada compania lo mester registra y finalisa e checklist cu ta basa riba e medidanan di D.V.G. E medidanan aki ta enfatisa protocolnan cu ya caba tabata existente y cu a wordo amplia pa asina inclui puntonan di ‘social distancing’ como tambe instruccionnan di higiena pa propio empleadonan. Cada checklist ta traha pa e respectivo sector, asina ta tuma bon nota di esaki.
E prome fase aki ta un stap mandatorio den e proceso, esta cu mester completa e checklist. Esaki no ta nifica cu no por habri tanten cu e checklist no ta yena. Ta importante si pa remarca cu tur compania lo mester tin esaki completa mas tarda pa dia 31 di mei 2020. E registracion aki lo ta disponibel den forma digital pa companianan por yena riba e website di www.arubacovid19.org. E registracion aki tambe ta valido den un forma retroactivo pa e companianan cu a habri caba, por ehempel sector di retail (tur tienda, incluyendo supermercado).
E categorianan pa cual tin registracion mandatorio ta inclui a. Food & Beverage (incluyendo trucknan di cuminda), b. Acomodacion, c. Retail, tienda y supermercado na e momento aki. Pa e grupo di companianan cu ta cay bou di e categoria di transporte (incluyendo taxi), operadornan di tour y actividadnan casino, y spa, nan registracion lo cuminsa dentro di poco. Esaki lo wordo anuncia pronto.
E registracion conhuntamente cu e checklist lo wordo revisa door di un ekipo y a base di e informacion brinda lo sigui cu e segundo fase of lo solicita informacion adicional di e respectivo compania. Lo por sigui pa e di dos fase solamente si e compania ta cumpli cu e medidanan di D.V.G. Cumpliendo cu esaki ta resulta den un seyo pa e compania pa asina e ora por mustra cu el a pasa e etapa aki. Esaki ta brinda, den un forma visual, e prome stap cu ta wordo considera como un pre-check como parti di e proceso di Aruba Health & Happiness Code (HH Code). Seyonan lo ta disponibel na A.T.A.
Despues cu e registracion y e checklist wordo completa y verifica, Departamento di Inspeccion y Higiena lo haci un bishita na e compania pa asina completa un inspeccion na e sitio di operacion. Durante e bishita aki, lo determina si e compania ta cumpli cu e protocol y medidanan mandatorio manera stipula pa D.V.G. Si esaki ta e caso, e compania lo ricibi un aprobacion final cu ta indica cu e compania a completa e proceso di Aruba Health & Happiness Code (HH Code). Cu e aprobacion final aki, e compania aki ta cumpli cu tur punto di atencion manera stipula, pa cual e compania lo wordo otorga un seyo final, color oro, cu ta dun’e un status eleva pa cumplimento cu tur protocol. Den caso cu e compania no ta cumpli cu e rekisitonan stipula, lo bay over na cera e compania, conforme procedura normal cu ya ta aplica prome cu periodo di COVID-19.
E seyo aki ta di suma importancia, mirando cu e ta brinda e oportunidad na cada compania pa ta orguyoso di no solamente cumpli cu e protocolnan di higiena y salud pa su empleado y bishitantenan pero tambe ta sirbi como un emblema di mercadeo. Pues e Aruba Health and Happiness Code (HH Code) sigur lo wordo mercadea, por medio di A.T.A., bou di nos bishitantenan, asina dunando tur compania cu a haci y completa e proceso un bentaha competitivo.
A.T.A. conhuntamente cu D.V.G. y Ministerio di Salubridad kier haci uzo di e oportunidad aki pa pidi cada compania pa completa e proceso mandatorio aki por medio di yena e registracion y checklist (prome cu 31 di mei) y di e forma aki contribui na haci nos isla uno higienico pa e comunidad local como tambe e bishitantenan di nos isla.
