Hefe di Asilo di Dimas, J. Harewood a keda suspendi di su funcion dia 15 di september 2022, despues cu na aña 2020 a cuminsa un investigacion na momento cu un par di documento a leak for di DIMAS, indicando cu e departamento aki a duna Corte di Prome Instancia informacion incorecto tocante un caso specifico di asilo.

Tur cos a cuminsa na momento cu un persona sin documentonan legal na Aruba a causa un accidente na e rotonde di Mahuma na aña 2020. Agentenan di polis na su turno a pasa e caso na man di Guarda Nos Costa.

Den un articulo cu Bon Dia Aruba a publica dia 26 di juni ta splica cu segun e orden hudicial (bevelschrift) di dia 1 di april 2020, minister di Husticia, Seguridad y Integracion e tempo aya, Andin Bikker a duna orden pa e persona concerni – di inicialnan B.B. – keda den detencion na Guarda Nos Costa. E hues comisario M. Soffers a determina cu e detencion (priva di libertad) di Guarda Nos Costa ta den cuadro di legalidad.

Riba 25 di mei di 2020, B.B. a entrega un peticion: artikel 16 derde lid van de landsverordering toelating en uitzetting (LTU). “Binnen 72 uur wordt de betrokkene voor een rechter-commissaris geleid, die de rechtmatigheid van de vrijheidsontneming toetst. Een bevel tot inbewaringstelling kan door de rechter-commissaris te allen tijde op verzoek van de betrokkene worden opgeheven.”

E peticion a wordo trata pa Corte di Prome Instancia durante un audiencia dia 3 di juni di 2020, unda B.B. tabata presente (via video camara), hunto cu su representante legal; e contra partido tabata representa door di J. Harewood (DIMAS) y M.E. Wernet (GNC) via video camara.

Declaracion di J. Harewood den Corte no ta cuadra cu hechonan di documento cu a leak

Riba punto 4.2 di e sentencia dia 10 di juni di 2020 (AUA202001277), J. Harewood (DIMAS) a duna di conoce durante e tratamento di e caso cu e procedura pa tuma decision a tarda pa motibo cu B.B. tabata den cuarentena pa dos siman largo, esaki relaciona cu e reglanan na vigor pa preveni e contagio di coronavirus. Como consecuencia, e persona aki no por a wordo scucha. Pero segun pagina 2 di e documento y mas investigacion periodistico, B.B. a wordo scucha dia 20, 21 y 23 di april di 2020 door di un funcionario di gobierno (DIMAS) C. Giel, loke ta 44 dia prome cu e audiencia di e persona en cuestion.

Tambe hues comisario M. Soffers a bisa dia 10 di juni di 2020 segun e sentencia (AUA202001277) cu “Awor cu B.B. ta den detencion en espera di e decision di su peticion di asilo, DIMAS mester trata e peticion di asilo mas lihe cu ta posibel”. Sinembargo, segun pagina 3 di documento cu a leak na Bon Dia Aruba, DIMAS no por trata algo mas lihe cu ta posibel si e persona B.B. ya caba tabatin un decision negativo riba su peticion di asilo na DIMAS, riba dia di 4 di mei di 2020.

Hoor en wederhoor K. Ruiz-Paskel

Den cuadro di investigacion periodistico, redactor di Bon Dia Aruba a manda 6 e-mail cuminsando dia 30 di juni 2022 pa director di DIMAS, Ruiz-Paskel pa haci diferente pregunta di e caso aki den cuadro di transparencia y pa duna derecho di replica tocante loke a publica den articulo di Bon Dia Aruba, mirando e importancia y magnitud di e publicacion. Estado di derecho na Aruba ta sigura decisionnan di huesnan independiente, imparcial, honesto y experto, basando su decisionnan riba informacion corecto di instancianan gubernamental.

Tocante esaki, dia 05 di juli 2022 Ruiz-Paskel su contesta tabata: “DIMAS su departamento di maneho, ta representa Minister na corte y den cuadro di e tarea y e responsabilidad asigna, tin e deber di tene na cuenta tratado, ley, maneho, proceso y en particular na reglanan di bon gobernacion.  E NO ta den nos practica ni etica di trabao pa duna informacion falso of incorecto na corte.”

Redactor di Bon Dia Aruba a considera cu e contesta aki no tabata satisfactorio mirando e cantidad di pregunta cu a haci na Ruiz-Paskel. Bon Dia Aruba su interes no tabata dirigi riba ken e persona aki ta, sino con e maneho pa su asilo a tuma luga. Ademas kier a haya sa e motibonan pakico a bisa hues comisario Soffers cu nunca e persona B.B. no a wordo entrevista na DIMAS, mientras cu documentonan ta señala cu dia 20, 21 y 23 di april di 2020, B.B. a wordo entrevista pa e funcionario di DIMAS C. Giel.

Tampoco redactor a haya contesta di Ruiz-Paskel unda cu a sali na cla den sentencia di dia 10 di juni 2020 di Corte di Prome Instancia, cu segun DIMAS a indica, “no tabatin decision di asilo pa B.B”, siendo cu documentonan cu a leak ta indica otro escenario cu un decision negativo di asilo.

Hoor en wederhoor J. Harewood

For di dia 7 di juli 2022, tambe redactor di Bon Dia Aruba a bin ta puntrando J. Harewood diferente pregunta di e caso aki den 5 e-mail cu a manda y tambe via Whatsapp, unda cu el a dicidi di no contesta y block e number di telefon di e redactor sin duna mas detaye di e caso.

Na e momentonan aki, Veiligheidsdienst Aruba (VDA) cu cooperacion di Algemene Inlichtingen- en Veiligheidsdienst (AIVD) di Hulanda a tuma e investigacion aki, unda J.Harewood a wordo suspendi, ya cu asilo ta keda bao responsabilidad di Reino Hulandes mirando e circunstancianan pa garantisa y proteha nos estado di derecho democratico.

No por descarta mas suspension den DIMAS y Guarda Nos Costa pa motibo cu esaki no ta e unico caso den cual e maneho no a bay manera e proceso mester ta.