Ayera diamars den oranan di merdia, director di Guarda Nos Costa (GNC), Andrew Hoo a suspende 4 funcionario di e departamento aki debi cu recientemente, den proceso di transportacion di un persona indocumenta, el a logra huy di e funcionarionan.
Den e incidente aki, cual a sucede dia 24 di mei ultimo, casi un luna despues,e funcionarionan en cuestion no a traha un proces verbaal pa asina splica kico por a sucede, tampoco nan no a meld e suceso.
Tambe, director encarga cu GNC, Sr. Andrew Hoo a habri investigacion riba presunto iregularidad cu placa di Land Aruba den e compra di pasashinan pa migrantenan cu ta ser deporta.
Segun informacion cu Bon Dia Aruba a haya, posiblemente Koninklijke Marechaussee lo reforsa GNC mirando e suspension di e 4 funcionario aki, caminda cu no ta descarta otro suspension mas.
Sinembargo, ta conoci cu esaki ta algo comun pa e funcionarionan di GNC pa motibo cu tin casonan anterior. Manera e detencion di e hoben Venezolano Maykol Chavez, cu a tuma luga na augustus 2022 y den cual e funcionario di fam Solognier y tambe ex-funcionario Perez tampoco a haci un proces verbaal; unda segun pruebanan cu Bon Dia Aruba ta dispone di dje, nan a kibra ley di trafico, pasa den verboden y persigui un solicitante di asilo. Te dia di awe nan GNC no produci un documento di controle unda cu e ta bisa cu nan a haci controle den verboden kibrando ley di trafico pa detene hende, demostrando asina e iregularidadnan y falta di transparencia den e departamento.
