Manera Crisis Management Office (CMO) a señala siman pasa, Aruba lo sigui experiencia cu mas oilspill na diferente area, debi na incidente di un barco cu a tuma luga na comienso di luna na Trinidad and Tobago. Sinembargo, esakinan ta bao monitoreo, segun CMO mes a sigura.

Den un post cu Brenchie’s Lab a publica riba Facebook por a mira algun potret di dia 10 di maart ultimo cerca di Natural Bridge, unda ta ilustra marcanan di oilspill den e luga aki, loke a causa reaccion di algun usuario, preocupacion y hasta mal contento.

A puntra Rino Hermans kico tabata e situacion actual na Aruba pa loke ta trata e incidente aki, caminda el a sigura cu e situacion a stabilisa y ta normal na e momentonan aki. Tambe a bisa cu ta bon pa hendenan keda atento ora ta cana rond y informa CMO, pa motibo cu nan tin un databank cu den futuro cu Aruba lo haya un scenario igual nan por sa unda e teerbalnan a tuma luga.

Nan a pidi e funcionarionan encarga pa scout y tambe pueblo pa duna nan contribucion debi cu mas data nan ta recoge, miho nan por traha nan plan di responde cu menos costo y mas lihe nan por recupera e normalidad na Aruba.

Hermans a sigura cu Aruba ta bay sigui mira den proximo tres siman y nan no ta nifica un peliger, “pasobra en principio oilspill no mag di ta un crisis ambiental, e no mag di stroba e landando y tampoco mag di stroba e turtuganan di pone nan neishi na e beachnan, esey ta e plan di responde di Aruba cu nos ta aplica y door cu e teerballs ta minimo, nos tin DOW su grupo cu ta cana rond y ora ta posibel nan ta piki e teerbalnan manera nos a haciel’e fin di siman ultimo na ful e costa cu 15 hende cu a bay piki tur di nan,” el a sigura.

Hermans tambe a declara cu Aruba ta custuma cu e teerbalnan door di Jamaica y Trinidad & Tobago cu tin un ruta di barconan petrolero cu si nan ta pump over board, a pesar cu e ta prohibi, Aruba ta afecta pa teerbalnan.

Den 2016 Aruba tambe a experiencia efectonan di oilspill despues tabatin e incidente na Amuay, Venezuela, den cual a monitoria cinco biaha pero door cu esey no a afecta Aruba, esey no a bay viral, pero nan si ta haya informacion door di tratado di Caribe (Centro Regional de Emergencia, Informacion y Capacitacion pa loke ta trata Contaminacion Marina – Caribe Rac- Rempeitc Caribe) e cual ta coordina oilspill y nan ta notifica e instancianan concerni, den caso aki CMO.

Potretnan ta di Brenchie’s Lab su Facebook Page.