(NLTimes) – Desde ayera, Prins Bernhard Cultuurfonds ta bay yama Cultuurfonds, e organisacion a anuncia riba X. E Prins Hulandes ken a fayece na aña 2004, a bira noticia luna pasa ora a descubri cu e tabata un miembro di e partido NSDAP, e partido Nazi di Adolf Hitler.
“Cu respet y aprecio pa e pasado, Cultuurfonds lo sigui for di awe cu un nomber cu ta pas pa ken nos ta awe y un enfoke riba nos contenido,” director Cathelijne Broers a splica den un video publica riba e plataforma. Cultuurfonds ta sostene proyectonan den cultura y naturalesa pa consevacion na Hulanda.
E descubrimento di e carchi di miembresia fisico y original ta un confirmacion di evidencia cu a surgi anteriormente cu Prins Bernhard tabata pertenece na e partido Nazi. El a cancela su miembresia na aña 193 ora cu el a compromete cu Princes Juliana, wela di Rey Willem-Alexander. Te cu su fayecimento, Prins Bernhard semper a nenga cu e tabata miembro di e partido Nazi.
Pasado Nazi di e Prins ta den constraste completo cu su reputacion como un heroe di resistencia den Segundo Guera Mundial. El a lidera resistencia for di London y tabata involucra den Cultuurfonds desde cu esaki a keda funda na aña 1940, segun NOS a reporta. E asina yama Spitfire Fund den e temponan aki, tabatin e intencion inicial di cumpra ekipo pa e guera. Ora cu e guera a caba, e fondo su enfoke a cambia na cultura y conservacion di naturalesa.
