Mediante un comunicado di prensa di Cuerpo Policial di ayera atardi, a informa cu nan a logra detene dos persona involucra den asesinato di un persona dia 24 di december ultimo na area di Matividiri.
Desde diaranson di siman pasa, Recherche Santa Cruz (DAR-4) a detene e homber di inicial B.E.J.M. naci na Aruba di 37 aña di edad relaciona cu e caso di asesinato di Sergio Maduro cu a tuma luga dia 24 december 2023.
Diamars ultimo, tambe Recherche di Santa Cruz a detene e dama di inicial J.R.G. naci na Aruba di 39 aña di edad.
Cuerpo di Polis a indica cu Recherche di Santa Cruz niun dia a stop di investiga y poco poco a haya suficiente informacion y prueba pa Ministerio Publico por duna orden pa detene e dos persona aki.
“Un tremendo trabao di recherchenan di Santa Cruz cu a traha incansablemente pa pone man riba e sospechosonan. Cu esaki tambe Recherche di Santa Cruz ta resolve e caso aki.” E comunicado a señala.
Diadomingo 24 di december den oranan di anochi cu pa mas o menos 7or central di polis a haya e notificacion cu lo tabatin un hende homber benta abao band’i caminda.
Polis a informa cu nan a despacha un patruya na e sitio y tambe a notifica ambulance.
Na yegada di e patruya ta bin topa cu un hende homber cu no tabata duna señal di bida, ambulance tambe a presenta pero no por a haci nada mas.
Ta pone e autoridadnan concerni na altura pa asina cuminsa un investigacion kico por a pasa cu e persona cu a ser haya sin bida.
Pa 8:35 Dr. Texier a constata morto y na e momento ey no a haya ningun identificacion, kedando e caso bao investigacion.
25 di december autoridadnan policial a informa cu e persona hende homber cu a ser haya diadomingo ultimo 24 di december morto banda di caminda na Matividiri a ser identifica como Sergio Maduro di 44 aña di edad.
