Parlamentario Desiree de Sousa – Croes a keda satisfecho cu con e debate cu a tuma luga den Parlamento dialuna a bay. E tempo cu a wordo duna pa gobierno bin cu contesta tambe e ta kere cu ta suficiente tempo
“Mi ta hopi contento y mi ta kere a pesar cu aki aya tin algun detaye, por bisa cu a tene hopi cuenta cu sentimentonan di e publico. E publico tabata dividi den Cristiannan, e personanan cu ta contra di un geregistreerd partnerschap (GP) y representante di LGBT community hunto cu nan famianan. Entre nan nos tabatin tiramento di palabra,” Segun Sr. De Sousa – Croes e ta haya cu el a wordo ataca hopi pa e grupo Cristian. Algo cu e ta keda haya straño como cu ta hende cu ta bay misa y ta pretende di ta biba un bida di Dios, sin embargo ta chercha un persona LGBT di diferente manera, manera cu a haci cun’e dialuna den parlamento. Segun e parlamentario, el a wordo yama pa tur sorto di nomber pa e grupo aki e ultimo dianan aki y mester enfatisa cu hopi Catolico no a haci esey.
Reaccion coleganan parlamentario
Bon Dia Aruba a puntra Sra. Desiree de Sousa – Croes, pa su opinion riba locual cu coleganan den Parlamento a trece dilanti dialuna. El a bisa cu loke ta di fraccion AVP e tabata sa cua ta e parlamentarionan ta sostene e amienda y algun cu publicamente a bisa cu nan no ta sostene. Pues tabata sa mas o menos unda nan debate lo a bay. “Di oposicion mi no tabata sa logicamente y mi a keda desapunta den algun colega cu ta purba ta carni y pisca of ni carni y ni pisca. E coleganan aki a purba acomoda tur hende den nan opinion, na final caba cu Dios, pa haya aplauso etc. Mi no ta haya cu esey ta un manera pa hiba un debate. Un debate bo mester hibe cu argumentonan, cu prueba y cu echonan pa purba convence un hende, anto esey mi no a haya ayera”.
Tambe tin Parlamentarionan cu pa hopi aña a traha den departamentonan y nan sa e proceso, a bisa cu e amienda no a cana su proceso. E proceso di amienda ta e dia ey den Parlamento y no ta bay Raad van advies. Nunca esey no a pasa.” P’esey Sra. De Sousa – Croes ta haye pret y straño. Esaki ta duna mi un sabor fastioso y a haya cu e ta un ofensa pa pueblo su inteligencia, pasobra cualkier persona por busca riba internet y haya sa kico ta un amienda. Sin embargo ta contento cu otro coleganan a splica kico un amienda ta y kico e ta encera. “MI mester bisa si cu mi ta contento cu e total di e dia, despues di merdia e ofensanan a baha y dado momento miembronan di oposicion a bisa cu mester busca un solucion. Tabatin un reconocemento di e desigualdad, pa mi esey ta un victoria riba su mes. Cu tabatin un reconocemento cu berdad cu gobierno, Parlamento of pueblo of sea un departamento riba su mes, lo mester haci cambionan necesario pa drecha y kita e desigualdad aki. Segun e Parlamentario den combersacion cu algun persona di e comunidad LGBT, nan ta contento cu a logra algo y ta un triunfo chikito. “Pa mi mi ta wak e como un triunfo grandi como politico.”
Pospone reunion
Sra. De Sousa – Croes a splica cu e ta compronde di gobierno cu nan mester contesta su preguntanan. Diabierna cu a pasa e parlamentario a manda 10 pregunta pa Minister di Husticia Arthur Dowers y pa Minister Presidente unda cu a puntra nan ki nan ta kere di e sentencia entre Oliari versus Italia unda cu ta bisa bon cla cu ta considera relacionnan entre parehanan gay como un bida di famia y cu nan merece un proteccion den leynan. Esaki segun e corte Europeo Supremo cu ta bisa esaki.
“Nos ta co firmante di Europese Verdrag voor Rechten van het Mens (OVRM), loke kiermen cu nos ta respeta locual cu ta sali for di hof. Y mi ta puntra si esaki ta directo di influencia pa pueblo of di gobierno pa pueblo, pues cu gobierno ta regla esaki pa su pueblo”. Gobierno a pidi tambe tempo pa e posibilidad cu den e tempo aki ta mira cu por bin cu un nota di cambio unda cu gobierno ta bisa cu mester cumpli cu OVRM anto cu mester introduci e GP den un cambio di ley, mientras u ta tratando e codigo civil. Esey ta duna espacio pa gobierno haci nan investigacionnan, haci nan preguntanan na nan huristanan etc. “Pues mi ta kere cu mirando tur esaki no mester mucho tempo pa bin cu un conclusion y un cambio”.
“E siman cu presidente di Parlamento a duna, ta parce mi mas cu suficiente tempo.” Personalmente Sra. De Sousa – Croes a bisa cu e lo no a worry dos siman, pero a duna un siman, cual ta parce suficiente
Terminando el a bisa: “Mi no ta bay ‘back down’ pa derechonan di e comunidad LGBT mi ta kere cu nada otro cu un GP of cualkier nomber cu bo kier dune pero, tur derecho cu un hende por haya cu un matrimonio, tur derecho pa mi ta e unico cu i por acepta”.
