(EFE) – Den varios audio publica diamars ultimo pa Noticias Caracol ta evidencia cu Sandra Navarro, casa di e narcotraficante Juan Carlos Lopez, a apoya di manera logistico y a aporta placa na e campaña presidencial di Gustavo Petro na departamento Colombiano di Casanare.
Asina ta mustra e investigacion di e noticiero, den cual a ser publica audionan di tapgesprek intercepta pa Administracion di Control di Drogas di Merca (DEA), Polis y Fiscalía.
Den un di nan -entre Navarro y Sonia Bernal, ken tabata candidato na Congreso pa coalicion di Pacto Historico y cu awe ta fungi como sub-director di gobierno, Gestion Teritorial y Lucha Contra Trata di Ministerio di Interior- e dos muhe ta papia di un cantidad di placa cu un di nan mester a laga pa e campaña na un luga conoci como “Casa Petro” na Yopal, capital di Casanare.
E audionan tambe ta evidencia con e casa di e narcotraficante a presta autonan pa transporta e ex-senador Gustavo Bolivar, cu awe ta candidato pa Alcaldia di Bogota y vice-presidente, pa Francia Marquez of pa e congresista Katherine Miranda pa eventonan di campaña na Casanare.
Igualmente, e investigacion ta revela cu Navarro a colabora cu e campaña di Petro na Casanare durante por lo menos seis luna, incluso a mustra su molestia pa e cantidad di fabor cu nan tabata pidi na dje.
E rapport aki ta un complemento presenta 13 di augustus ultimo den cual Noticias Caracol a revela un evento di campaña di Petro cu a ser realisa na cas di Lopez, conoci cu e alias “Sobrino” y ken despues di paga un condena na Merca pa narcotrafico tambe a ser condena na Colombia.
Tur e caso aki a bira conoci despues cu Nicolas Petro Burgos, yiu di e hefe di Estado, a reconoce na Fiscalia cu a ricibi placa di origen ilicito y cu parti di esey a drenta den e campaña presidencial di Petro na 2022, aunke a aclaria cu su tata no tabata sa di esaki.
