Minister di Asunto Economico, Geoffrey Wever a anuncia un plan cu a prepara. Pa basta tempo ta papia di diversifica economia, e gastonan di bida y inflacion ta aumentando y Aruba su modelo economico ta dirigi riba turismo; awor mester pensa riba diferente modelo nobo pa haci Aruba miho prepara pa futuro.

Pa e motibo ey, ora minister Wever a keda encarga cu cartera di Asuntonan Economico, e parti di sostenibilidad tambe mester haya contenido. El a institui un grupo di profesional local riba tereno di sostenibilidad pa yuda minister cu rapportnan y pa presenta un plan coherente cu por implementa, el a bisa.

“No un plan cu ta demasiado ambicioso y dificil pa realisa, cu ta contene proyectonan cu ta realistico,” minister Wever a señala.

E grupo di profesional a analisa diferente rapport y basa riba esey nan a traha un prome rapport. Nan ta bay discuti esaki back cu nan stakeholders pa asina nan tin un draftblaad completo y evita traha un plan cu ta leu di e pais y di stakeholders, cu na final di dia, “ta esnan cu mester yuda bo implementa un plan,” el a sigura.

Den un sesion cu stakeholders na Teresita Center, nan a presenta e prome plan of draft y tabatin diferente participante, entre otro, compania estatal, departamento di gobierno, hotel, academia, banco y gremio. “Tur sorto di organisacion den nos comunidad a participa na e sesion ey y a duna mi ekipo e imput necesario pa nos por a continua. Y nos a hinca nan den diferente categoria, nos a scucha nan feedback y nos a incorpora esey den e final draft.”

E final draft ta contene e imput di stakeholders y ora esey a keda cla, nan bolbe hib’e te na un grupo mas chikito di economista, director of personanan cu tin experiencia den tereno di sostenibilidad. Y ora nan a sinti cu nan a compromete nan mes cu comunidad na un forma cu tur hende a haya e posibilidad pa duna nan participacion, nan a rond af e plan aki y Wever a presenta na Conseho di Minister.

“Esaki ta e proyectonan cu nos ta kere ta proyectonan cu nos por realisa den e periodo nos dilanti. Algun ta proyectonan cu ya ta den ehecucion y algun nos ta bay prepara awor cu e miras di converti Aruba den un isla mas sostenibel y duradero,” Wever a bisa.

Diahuebs ultimo, Conseho di Minister a bay di acuerdo pa cada proyecto haya su mesun governance, pa asina evita cu esaki ta un proyecto solamente di Ministerio di Asunto Economico; y Conseho di Minister a bay di acuerdo pa cada proyecto haya su mesun governance, ki ley nan mester cumpli, door di cua stakeholders y con lo financia e proyectonan aki, cu ta den e Aruba’s Transite Naar Een Duurzaam & Inclusief Economish Model, Nationaal Actieplan 2023-2025.

“Cada proyecto lo haya su ehecucion, pero aworaki nos tin un framework mas realistico di kico nos ta bay haci den proximo dos aña pa loke ta sostenibilidad. E ta un prome paso, e no ta un solucion pa tur nos problema, pero e ta si e paso concreto pa nos cambia e direccion di nos pais y haci un pais mas sostenibel y pa evita cu nos ta tras di proyecto y otro proyecto, si tin un coherencia. P’esey nos a prefera di bin cu un framework mas holistico caminda nos ta bisa cu tur e proyectonan aki ta relaciona na otro y ta yuda nos logra e meta cu nos tin pa nos ta mas sostenibel,” minister Wever a declara.

Cu esaki, minister Wever ta indica cu nan ta espera di por crea un modelo economico nobo pa asina diversifica economia di Aruba, pa crea cuponan di trabao diferente, inversion diferente, pa proteha Aruba mas di inflatieschookken y p’esey ta necesario pa e pais bira mas resiliente.

E foco di e plan ta pa tur hende por haya participacion y pa nan por crea oportunidad. E ekipo cu nan tin ta bay ta lidera e proyecto aki conhuntamente cu otro stakeholders. Pa cu proyectonan, tin algun di nan cu ta riba energia solar, incentivo fiscal, agricultura, entre otro proyectonan cu gobierno lo tuma iniciativa.

A presenta e plan nobo aki caba na Parlamento di Aruba hunto stakeholders cu a trece dilanti e parti mas tecnico, unda nan a haci na esfuerso pa combina e diferente vision di hopi hende importante den sociedad pa por tin un plan ehecutabel.

Sinembargo, na aña 2020 Gobierno di Aruba a presenta e Master Plan “Reposicionando e rumbo di nos pais,” un plataforma nacional consisti di 125 persona experto den diferente area cu a trece dilanti diferente reforma structural y accion concreto pa un base solido pa recuperacion economico y innovacion, pa Aruba por a identifica su economia. Tres aña despues, minister Wever tambe ta presenta un plan similar. Reportero di Bon Dia Aruba a puntra na minister Wever kico ta e diferencia entre esaki cu esun di 2020, si por garantisa cu e plan aki ta mas factibel cu esun di 2020, ya cu no a tende mucho mas tocante e plan anterior.

Minister Wever a contesta cu nan a pasa door di tur rapport cu tabatin caba pa nan no haci tur cos di nobo. “Un di e rapportnan cu nos a usa pa yega na e Actie Plan aki, ta entre otro e Master Plan, e cual ta un documento hopi importante. Tin hopi cos cu ta poni den Master Plan cu tambe ta parti di e Landspakket, cosnan cu e tempo ey a wordo identifica door di nos 125 profesional. Ttambe ta cosnan cu a bin den Landspakket, hopi cos cu nos ta ehecutando den cuadro den Landspakkee bo ta bay hay’e tambe den e Master Plan. Ora Master Plan a wordo prepara, e Landspakket no tabat’ey; ora Landspakket a bin a hinca hopi cos cu entre otro ta den e Master Plan tambe. Den cierto sentido e Master Plan ta den ehecucion y por ehemplo, e Master Plan no ta contene e parti di sostenibilidad y naturalesa. Aworaki nos ta kere pa enfoca riba dje y nos ta enfoca den cosnan cu ta realisabel y realistico, nos no tin un presupuesto ilimita,” el a finalisa.