Ayera mainta na Aula di Universidad di Aruba a tuma luga e conferencia “Breaking the silence – Join us to end violence against women in Aruba” cu presencia di diferente profesionalnan den area aki caminda a trece dilanti e problema di violencia contra hende muhe y mucha muhe na Aruba.

Na nivel mundial, violencia di genero ta sigui keda como un problema general, unda violencia contra hende muhe y muchanan muhe ta un fenomeno particularmente frecuente, estudionan reciente manera esun di Mr. A. Rasmijn-Marval’s tocante “Women’s Experiences of Intimate Partner Violence in Heterosexual Relationships in Aruba and the Negative Health Consequences,” a señala cu a pone un luz riba e realidad alarmante den nos comunidad.

Segun loke nan a presenta, un di cada tres hende muhe y mucha muhe na Aruba ta sufri di violencia domestico, pa esaki, D.R Benedicta Deogratias, LLM y profesor na Universidad di Aruba a splica con ta examina e violencia contra hende muhe como un violacion di derechonan humano, e forma di violencia no ta limita na abuso fisico solamente, sino cu ta extende te violencia psicologico, sexual y institucional.

E consecuencianan pa e victimanan cu ta sobrevivi na esaki ta profundo afectando su salud fisico y ta laga efectonan permanente den nan bienestar mental, independencia financiero y nan posicion social den nan comunidadnan.

Violencia contra hende muhe y muchanan muhe ta representa un violacion di nan derechonan humano fundamental, ta exigi medidanan urgente y integral pa elimin’e.

Rish-Ann Ammerlaan ken ta trahado social na Fundacion Contra Violencia Relacional a menciona cu den conexion cu Dia Internacional di Hende Muhe nan a haya invitacion di Universidad di Aruba pa participa na e conferencia aki papiando di kico e fundacion ta haci, kico ta loke nan ta ofrece na e comunidad pero tambe kico ta e cosnan cu ta stroba nan di por continua cu e trabou den su totalidad, manera mester ta.

El a conta cu pa loke ta trata ley, esaki mester un adaptacion pa motibo cu leynan mester ta ‘in place’ pa por ta na fabor di e sobrevivientenan den e caso aki, e cooperacion entre nan cu e Cuerpo Policial por ehemplo, y kico nan por mehora den esey pa e victima keda central.

Tocante cifranan, el a menciona cu no a varia hopi y nan a keda similar compara cu añanan anterior, “si nos por nota, riba rednan social e casonan ta biniendo mas dilanti, hendenan ta durf ta papia mas di esey, pero lamentablemente riba rednan social nos no por haya e ayudo necesario y profesional, p’esey mi ta encurasha tur hende cu por ta pasando door di e situacion aki pa yega na Fundacion Contra Violencia Relacional, nos sa cu ta un tema cu no facilmente nos ta papia di dje pero mi por bisa cu e ta un tabu, cu tin dependencia emocional of financiero, factornan cu por stroba nan di busca e ayudo necesario,” Ammerlaan a señala.

Violencia relacional no solamente ta sucede cu hende muhe sino tambe cu hende homber, pa esaki, Ammerlaan a sigura cu e cifranan pa hende homber ta mas abou, pero esey tin di haber cu factornan manera entre otro, e cultura cu cual hendenan ta lanta for di chikito, hende homber no por mustra nan emocionnan compara cu hende muhe, hende muhe ta mas sumiso, hende homber ta “e macho di cas” kiermen dificilmente, nan ta uit nan mes y bisa kico nan ta pasando door di dje loke ta haci cu menos lihe nan lo acerca e fundacion pa busca ayudo pero, cu tin hende homber cu ta sufri di maltrato esey no ta un secreto, segun loke Ammerlaan a sigura.

Miangela Ras di Centro di Desaroyo di Hende Muhe (Cedehm) a trece dilanti cu como instancia nan ta sostene y nan a uni pa papia di e tema aki “como Cedehm nan angulo ta pa eradica discriminacion di hende homber cu hende muhe pasobra un di e causanan origen di violencia contra hende muhe of hende homber ta e nocion cu un ta mas cu otro, ora cu nos cuminsa kibra e cultura machista cu nos ta biba aden, e ora ey nos ta haya resultado di berdad,” el a sigura.

Den su opinion, no solamente hende homber ta propaganda e machismo, hende muhe tambe ta hacie hasta mas cu hende homber mes, “esaki tin di haber cu centenares di aña di educacion pa wanta e poder na un caminda, ora un hende tin poder e no kier dun’e na otro hende, esey ta importante, pa nos realisa cu e unico manera cu nos ta bay haci un diferencia pa cambio, ta radicalmente no participa na machismo, por ehemplo ora ta wak un hende muhe ta sexualisa of ta ser usa pa bende hasta bateria, partinan di auto, pa cerbes, na e momento ey mester reconoc’e di na unda e ta bin y bisa algo, si colectivamente nos ta cuminsa haci esey, nos por trece un cambio,” el a bisa.

Julien Duran, ken ta fungi como senior gender-based violence officer na HIAS, a informa cu den e organisacion aki nan tin un departamento specifico pa violencia basa den genero cual ta un di nan departamentonan pa duna un apoyo na loke ta trata comunidad di migrante, refugio y personanan desplasa.

Nan rol den e conferencia aki tabata pa papia tocante e diferente factor di opresion cu ta cay riba un sobreviviente di violencia, esaki por ta basa riba nan status migratorio, nan edad, nan nacionalidad, componentenan cu nan a splica con ta afecta e comunidad di refugiado y con ta yega na e punto di causa violencia.

Pa hopi biaha, den e comunidad di refugiado y migrante un di e componente cu ta haci cu nan ta cay den un riesgo di violencia ta cu nan ta bin cu e idea di tene un relacion cu un pareha local cu ta bay firma pa nan “e falso promesanan hopi bunita na comienso di e relacion y despues e no ta caba asina, e perpetrador pa hopi biaha ta manipula e personanan aki y causa diferente tipo di abuso y violencia, door di nan status migratorio nan ta usa esey pa manipulacion pa por causa violencia,” Duran a sigura.

Igualmente el a bisa cu nan a registra un aumento di casonan cu nan ta ricibi na HIAS y cada aña e ta bira mas y mas, di situacionnan cu ta bin for di un pareha local pa un persona migrante of refugiado.

Pa finalisa, mester reitera cu violencia di genero domestico ta constitui un violacion na e principionan consagra den e Declaracion Universal di Derechonan Humano, entre otro, violencia contra hende muhe ta un violacion na e derecho di bida, libertad y siguridad di su persona (articulo 3) e derecho di no ser someti na tortura, trato cruel, inhumano of degradante (articulo 5) di igualdad den ley y e derecho di igual proteccion cu e ley (articulo 7) e derecho di asisti na un corte imparcial (articulo 8 y 10) y e derecho di move di manera liber (articulo 13) di libertad di reunion y asociacion (articulo 20).