(AP) – A pone Zurich Zoo su gorila stima di mas di 40 aña drumi despues di un lucha largo cu su salud den deterioro, un oficial di zoologico den e ciudad Suiso a informa diaranson.
N’Gola tabatin 47 aña y un di e gorilanan masculino mas bieu den zoologico di Europa, segun director di Zurich Zoo Severin Dressen a comenta.
E tabata un gorila di Western Lowland – un sub-especie haya na Africa y considera criticamente den peligro di extincion – y a causa di su edad halto e tabata un asina yama ‘silverback’, nombra pa e cabeynan silver na su lomba.
N’Gola tabata sufri di un gran cantidad di problema den su salud, incluyendo arthiritis, un problema den su curason y infeccion di bichi. E tabata bebe pildo pa dolor pa varios aña, comiendo mienos y perdiendo peso y musculo. “E tabata un decision dificil pa pone un ‘silverback’ drumi,” Dressen a comenta.
“Nos a mira un caida den selva durante 3 generacion di 80% di e poblacion,” Dressen a comenta tocante e caida den gorila den selva. Zoologiconan por ta util pa investigacion y educacion di publico tocante proteccion di especie, el a agrega. N’Gola a nace den cautividad y ta tata di 34 mucha. E tabata conoci pa su banda sensitivo, cuidando di “su harem, su grupo di femeninonan,” Dressen a comenta.
Den 2012, un muhe den su harem a sufri un complicacion den su appendix durante embaraso avansa, y ambos e y su baby a fayece, segun e corant Suiso Neue Zuricher Zeitung. N’Gola a pasa simannan ta yora den e zoologico buscando e, segun e reportahe.
Dressen tambe a recorda un tempo unda N’Gola a cuida un baby den e grupo. “E mama no tabata presente y e – cual no ta un comportamento tipico pa Silverback – a cuida di e baby.”
Pa loke ta trata ser humano, N’Gola den gran parte a “ignora otro especienan cu ta na otro banda di e glas” di su habitat, Dresen a comparti.
