Ayera mainta, minister di Turismo, Dangui Oduber a informa mediante su rednan social cu tin algun proyecto na caminda pa embeyecemento di algun area di Savaneta.
“Trabaonan a continua den fin di aña y nos ta contento cu a logra pone boulders na e beach di Santo Largo Savaneta, pa asina evita cu autonan ta subi riba beach y daña esaki. Positivo pa proteccion di nos beachnan. Tin algun proyecto mas den pipeline pa e area di Savaneta,” e mandatario a skirbi.
Pa algun ciudadano esaki no a cay den bon tera y a cuestiona e hecho di cera un parti di e beach cu boulders, ya cu segun a skirbi riba rednan social, “no tin beach mas pa hendenan local y esnan cu ta keda ta cera nan cu esaki.” Ademas otro comentario manera “awor si nos no por bay lama ni pa bay campa cu nos ta haci cu e mucha na Santo Largo, masha tempo nos tabata usa e beachnan ey pa hacimento di aña y pasa dia, nan ta haya bon pa cera full luga cu baranca,” un usuario a señala.
Otronan tambe a skirbi cu si “esaki tambe ta henter Aruba cu quadracers na tres trapi y mas,” “daña tur e luga ohm, nan no sa mas kico pa haci.”
Sinembargo, otronan a mustra nan opinion riba e decision aki mirando cu segun esaki ta pa protege e area aki un poco mas, mirando cu ta baranca nan a pone pa auto no yega cerca di beach y santo, pero hendenan si por disfruta di e beach mes si nan ta parkeer nan auto un poco mas atras.
Potretnan ta di usuario di Facebook y di minister Dangui Oduber su page.
