A pidi extra stock pa traha pan pa 4 luna

Situacion di coronavirus na Aruba ta pone cu persona ta preocupa pa e posibilidad di falta di cuminda. Asociacion di Panaderia ta bisa cu nan ta den bon comunicacion y prepara pa cualkier situacion cu yega.

Miguel Nucette, director di Bright Bakery a duna di conoce cu nan a pidi proveedor di afo pa manda ‘extra stock di cuatro luna’. Pues pa pueblo mantene calma, pasobra nan tin suficiente pan. Pan pa suministra pa supermercado, minimarket y nan mesun localidad cu ta habri. “Nos bentana ta habri di 8or di anochi, pa persona por warda den auto y ora wak cu no tin hende, por baha y haya nan pan. Esey ta un manera mas sigur.”

Otro medida cu nan a tuma ta den tienda a kita stoel cu mesa, cu hende no mag sinta actualmente pa disfruta. Nan ta laga maximo 8 persona drenta pa haci nan pedido. Den e area pafo nan por sinta, pero e mesanan ta poni leu di otro.

Tur otro medida di cuido tambe a tuma pa cada empleado tin nan mask pa nan cara, glove, handsanitizers (tambe pafo pa cliente cu drenta por haci uso). Nan ta informa pa cada persona cu ta malo no bin trabou y tuma AO (meld ziek).

Pa locual ta trata producto mes, a haci e pedido pa importa. Nan tin e capacidad pa henter pueblo di Aruba, pues ta pidi pueblo pa nan ‘keda trankil cu lo tin pan na Aruba’. Tur ta trahando hunto y pendiente di decision cu gobierno ta tuma, pa cumpli cu esey.

Normalmente nan ta cera 8or di anochi manera gobierno ta pidi. Sinembargo e bentana cu nan tabata cera pa merdia, awo a dicidi di laga habri te cu 8or di anochi, pa asina hende no mester cana rond paden.

Pa locual ta trata e panaderianan rond di Aruba, nan tur ta den palabracion hunto. “Ta pidi pa comunidad keda trankil. No ta bay tin aumento di prijs di pan y suministro y tur cos ta keda mescos”, el a bisa.

E asociacion lo keda informa si tin algun cambio, pero ta keda pendiente di locual gobierno ta bisa. Nan ta keda recomenda pa tur hende keda cas. Sinembargo ta pidi pa cliente cu yega panaderia preferibel warda den auto pa e luga no yena y luga keda mas trankil (den cualkier luga cu bay) ‘ban yuda otro’.

Nucette tambe a comparti tocante e situacion di entrega, den caso cu yega asina leu cu nan lo mester haci entrega (delivery). El a bisa cu nan ta entrega actualmente pa tur minimarket, supermercado y snack cu ta pidi for di nan. Si yega ley cu ta ricibi yamada, nan lo manda auto pa hende no tin cu bay leu.