A pesar di test negativo haci na aeropuerto; Residentenan cu ta bin di afo mester warda cuarentena di 10 dia

Minister Presidente, Evelyn Wever-Croes a anuncia cambio nobo riba e medidanan pa contraresta e casonan positivo di Covid cu a cuminsa aumenta keto bay na Aruba.

Sinembargo practicamente e medidanan aki no ta aplicabel pa nos bishitantenan. E prome mandatario ta haya cu e reglanan aki tin otro biba door di un turista cu a dicidi bin nos isla memey di e pandemia, y un ciudadano residencia na Aruba. P’esey nan ta haci un apelacion na tur ciudadano pa yuda frena e contagio di Covid pasobra ta nos economia ta wordo afecta.

Un fuente nobo di contagio tin di haci cu e residentenan cu ta biaha afo. P’esey residentenan cu ta biaha mester test na yegada na aeropuerto. Pero tambe ta urgi pa tene cuarentena pa 10 dia, a pesar di haya resultado negativo.

Tin medidanan cu ta drenta na vigor entrante awe y nan ta bay segun un escalacion. E medidanan siguiente ta keda vigente pa dos siman cu speransa cu nan lo yuda frena e aumento di casonan. Si nan ta funciona eventualmente, gobierno lo flexibilisa e medidanan. Pero si nan no ta funciona, nan lo mester bin cu medidanan nobo y mas severo. Nan lo por ta medidanan cu por afecta te hasta e libertad di movecion di nos hendenan y tambe nan lo afecta nos economia mas tambe.

Medidanan

Nan ta permiti pa restaurant ta habri si un persona ta sali pa come. Pero si e persona ta bay pa djis bebe, ta considera esaki un factor di halto riesgo, ya cu esaki tabata un causa cu a contribui den e segundo ola mas grandi di contagio cu nos a conoce na Aruba.

E biaha ey nos a conoce alrededor di 1600 caso den un tempo record te cu luna di september. A tarda casi tres luna pa nos por yega na 100 caso back. Den cuadro di e medidanan nobo aki, si e rumshop (bar) no ta sirbi cuminda e ta keda cera.

Riba e parti di entretenimento e prome mandatario a bisa cu e crisis team lo mantene contacto cu e musiconan pa atende cu e diferente detaye. Ya cu por ehempel den un establecimento ta permiti maximo 8 persona na mesa paden y 10 pafo. Mientras cu e cantidad di musico of artista lo ta 3 artista, ya sea paden of pafo.

Igualmente caminda tin musica no por baila y mester mantene e distancia y tapa boca bisti, logicamente cu excepcion na ora di come. E musico ta keda responsabel di e hendenan pa stop e musica si nan ta lanta baila. Pues atendiendo e interes y preocupacion di e sector di entretenimento, e prome mandatario ta haya cu miho e crisis team por sinta cu nan pa discuti e detayenan. E ta spera cu nan por yega na otro mescos cu nan a yega na otro pa e protocol.

Gobierno ta consciente cu e medidanan nobo cu a keda anuncia ayera, lo afecta hendenan cu ya caba tin permiso y plannan den cuadro di e temporada festivo di e luna aki. Crisis team lo tuma contacto cu e organisadonan cu tin permiso caba pa un evento, y cu no ta cumpli cu e reglanan aki. E intencion ta pa busca un solucion na dje.

Encuentro social y familiar

Pa encuentro social y familiar e maximo di persona cu por ta presente ta 30 persona paden y 60 pafo. Esta si tin e distancia di un 1.5 meter di un hende for di otro den e sitio y cu nan tin tapaboca bisti cu excepcion di ora di come of bebe algo, ya cu esaki ta un regla basico. E cantidad di hende pafo ta depende di e grandura di e cura, cumpliendo cu e distancia exigi, y tampoco no por baila.

Riba tereno deportivo cualkier actividad por tuma luga, pero sin publico. Pa loke ta entiero e maximo di persona permiti ta 30, y esunnan presente mester tene distancia y bisti tapa boca.

Pa loke ta tienda y supermercado ta permiti un persona pa famia, caminda mayoria di e supermercado ta aplica e regla di un garoshi pa cada hende cu ta drenta pa mantene e distancia. Tambe nan mester percura pa ehecuta tur regla di higiena exigi.

Argumento

Nan a dicidi di bin cu e medidanan aki, ya cu e casonan a cuminsa aumenta back. Te ayera tabatin un cantidad di 151 caso activo. Tin 9 persona den hospital di cual 2 ta den cuido intensivo. Nos por maneha e situacion aki y si nos tin garantia cu e ta keda asina, segun e prome mandatario. Sinembargo e tendencia ta mustra cu e casonan ta sigui aumenta, y e ta keda un preocupacion.

P’esey gobierno a dicidi di bin cu e medidanan aki awor pa asina den e siguiente dos siman nan lo sigui monitorea e situacion miho. “Si nos no ta tuma accion awe, aki un siman nos lo conoce 60 caso pa dia nobo.” asina el a bisa. Esaki segun calculacion di nos expertonan, y esaki ta hiba nos den e mesun situacion cu e di dos ola di contagio cu nos a conoce na luna di augustus y september. P’esey nan a dicidi di bin cu cierto decision pa frena e tendencia di aumento di casonan nobo di Covid riba nos isla.