A pesar cu Hulanda no ta sinti confortabel cu e amienda cu a wordo introduci den e ley di LAft (Landsverordening Aruba financieel toezicht) cu a trata luna pasa den Parlamento, Parlamentario Endy Croes (MEP) a contesta na Bon Dia Aruba cu nan ta para ariba cu nos organo legislativo a haci lo corecto.

A pesar di e presion di Hulanda, cu no ta acepta loke Parlamento di Aruba a haci luna pasa, unda nan ta haya cu practicamente a elimina e supervision Hulandes for di LAft. Pa Parlamentario Croes no ta cuestion cu di biaha Parlamento ta bay cambia e ley bek, sino cu cualkier decision mester consulta internamente. Ya cu nan a percura di coregi constitucionalmente locual entre otro Raad van Advies tambe a duna conseho for di augustus 2015, pa bin cu e cambionan aki ora cu den gobierno anterior a aproba e LAft.

Parlamentario Endy Croes ta un di e miembronan di e fraccion di MEP cu a bin cu tur sorto di denuncia y el a caracterisa su mes pa su forma energico, y tambe pa defensa autonomia di Aruba den Reino Hulandes. El a indica cu tin un ley di LAft cu a wordo aproba na cuminsamento di luna di juni ultimo, y cu a wordo coregi constitucionalmente.”Nos no a haci nada malo riba esaki”, el a declara na Bon Dia Aruba.

E Parlamentario ta kere cu mester keda sincero y busca salidanan cu lo beneficia tanto Aruba y kisas Hulanda cu no kier acepta cu ‘eror cu kisas a wordo cometi. Un aspecto cu Parlamentario a referi na dje ta cu e aña aki, pais Aruba mester paga 232 miyon florin solamente na interes y no na capital riba e debe nacional. Mientras cu Hulanda for di 2014 a pone un KB riba e gobierno anterior, y nan a para un banda y bin cu un organo di supervision CAft, y mira con e debe a sigui aumenta.

El a indica cu contrario na e situacion di Corsou, Aruba nunca a pidi Hulanda placa, y tampoco pa nan paga nos debe, pero si pa trata otro cu respet. “Nos no kier placa, nos kier si e respet pa nos por maneha, coregi y drecha e pais aki corectamente”, el a bisa.

Mientras cu Aruba a pidi pa laga nos beneficia di e interes abou di 1.5% cu Hulanda ta haya for di instancia di credito internacional. Ya cu pais Aruba tin cu fia for di New York of banconan local placa cu un interes halto entre 5% pa 6%. E ta un cifra halto cu Aruba tin cu paga na interes so.

E ta haya cu awor Hulanda ta purba di troce man di nos gobierno cu tur sorto di regla. Mientras cu nan mes tabata particip’e di e mal maneho financiero y mal gastamento di placa di gobierno anterior.

 

Mirando cu Presidente di Parlamento y lider di fraccion tabatin un conferencia dialuna ultimo el a remiti su mes na loke nan a bin cu informacion concreto tocante IPKO. Pero tambe den Conseho di Minister di Reino a base di e declaracion duna pa Prome Minister, Evelyn Wever-Croes.

Nan mes tabatin programa un reunion pa dialuna ultimo riba Traimerdia y tambe cu nos gobernantenan pa haya tur informacion rond di e reunion di Conseho di Minister di Reino diabierna ultimo.

Den e ley nobo di LAft, segun parlamentario Croes, Hulanda tabata kier dos cambio cu a wordo introduci; pero parlamento den su funcion y autonomia a haci e demas cambionan.