Un problema cu lamentablemente a bin ta crece durante añanan ta e problema di cacho y pushi riba caya. Diferente fundacion y organisacion ta traha activamente pa suavisa e problema aki, reduci e cantidad di cacho y pushi riba caya, y yuda mas bestia posibel. Den nan esfuerso pa combati e problema aki, gobierno a introduci algun aña atras e Comision di Accion pa Regulacion di Cacho. Den e relato anual 2024 di prome minister demisionario ta elabora riba e trabounan di e comision aki.

E Comision di Accion pa Regulacion di Cacho. A ser institui na 2019 door di minister di Asuntonan General den consulta cu minister di Husticia, minister di Turismo, y Minister di Infrastructura.

Na maart di 2019 e problema di cacho y pushi riba caya a ser declara como urgente en conexion cu e asina yama “kill cage” e tempo ey y e epidemia di cacho cu tabata reina na Aruba. E problematica aki di cacho riba caya ta resultado di e comportacion iresponsabel di e doño di cacho pa cu su cacho. Esaki, e relato anual ta informa, ta bisto for di e hecho cu mas cu mitar di e cachonan cu ta core los riba caya tin un doño. Cual ta e motibo pakico a revisa e Ordenansa di Cacho na 2012 y a drenta na vigor entrante 1 di januari 2015.

E censo piloto di CBS realisa na 2019 a mustra cu molester causa pa cacho riba caya tabata number dos di e top cinco, concluyendo cu a pesar di e entrada na vigor di e Ordenansa di Cacho na 2015, sociedad toch a experiencia hopi molester di cacho na 2019.

Cu inauguracion di Gabinete Wever-Croes II na 2021, e tema di bienestar di bestia a ser asigna na ministerio di Transporte, Integridad, Naturalesa y Asuntonan di Adulto Mayor (MinTINO). E presidente di e comision di accion aki a yuda MinTINO te memey di 2022 pa tene mas actividad riba caminda y haya proyectonan nobo riba caminda pa loke ta trata e Plan Nacional.

Den e relato anual di prome minister ta splica cu na fin di 2021, a pone recursonan disponibel a traves di transferencia pa inverti den plannan inclui den e Plan Nacional na 2022. A sigui splica cu for di memey di 2022, y tambe durante añanan 2023 y 2024, e comision di accion aki no tabata igualmente activo den prome plano, pero tampoco no tabata inactivo. Pues durante 2024 e comision di accion a realisa diferente actividad.

Un Plan Nacional di Maneho di Poblacion di Cacho a ser na 2019 pa pone atencion riba kehonan tocante e asina yama “kill cage”, pa tin un aplicacion mas adecuado di e Ordenansa di Cacho sin pone peso adicional riba Cuerpo Policial Aruba (KPA), y finalmente, pa atende e molester causa pa cacho cu ta core los riba caya.

E plan di accion multidisciplinario aki, cu a keda aproba door di Conseho di Minister na april 2019, a keda concretisa door di e Decreto Real di october 2019 cu lantamento di e comision di accion aki.

E Comision di Accion di Regulacion di Cacho mester conseha gobierno riba tur area di politica relaciona cu e problema actual, caminda mester pone atencion tambe na e siguiente obhetivonan: promove propiedad responsabel di cacho; promove e salud y bienestar di e poblacion di cacho, di tanto cacho cu doño como cacho sin doño; reduccion di e cantidad di cacho riba na un nivel aceptabel; prevencion di comercio ilegal y importacion ilegal di cacho.

Accionnan

Den e relato anual ta indica cu for di 2019, ademas di campañanan di informacion anual, e comision di accion a tuma tambe pasonan visualmente mas concreto, manera e conversion di e tempo ey asina yama “kill cage” den un centro di control di cacho (Centro di Control di Cacho, CCC) na juli 2020. Un unidad di control di cacho (Dog Control Unit, DCU) tambe a ser lanta na 2020 pa combati cachonan riba caya.

E relato ta sigui splica cu DCU tabata caracterisa pa un bon cooperacion entre KPA, BCI, GKMB y CCC, loke a nifica cu ehecucion di e Reglamento di Cacho no tabata exclusivamente asigna na KPA, pero tabata ser comparti cu DCU.

Na comienso di 2022 a cumpra 10 mil microchip pa identifica cacho cu ta sea reuni cu nan doño of adopta for di CCC. Tambe a financia e desaroyo di un base di dato pa registracion di cacho cu tin microchip. Ademas a cumpra materialnan necesario pa CCC y DCU y a pone un presupuesto disponibel pa informacion adicional.

Pa loke ta e area di educacion, e comision di accion a organisa diferente campaña cortico di informacion pa medio di competencia di dibuho tocante e Ordenansa di Cacho, specialmente pa alumnonan di kleuterschool y scolnan basico pa encurasha amor pa bestia.

KPA

Na maart 2023, 11 director di bario di KPA, riba peticion di Hefe di Polis, a ricibi un curso di teoria y practica duna pa e presidente di e comision di accion riba e “ins & outs” di e Ordenansa di Cacho pa nan por enforsa e ley adecuadamente. KPA tambe ta kere cu e situacion aki ta saliendo for di man pasobra ta observando un aumento enorme den e cantidad di incidentenan (morde) door di cachonan.

E relato ta remarca cu e problema di cacho tambe ta afecta e calidad di bida den sociedad. BCI y GKMB tambe a ricibi un curso similar na 2021, pero debi na e stop di asistencia di ehecucion di parti di BCI na 2022 y asina e stop di e DCU, ehecucion un biaha mas a bin sosega solamente cerca KPA.

Tambe na juli 2023, un total di 127 oficial di e servicio di vigilancia y tambe e unidad di cacho a ricibi un curso cortico riba e Ordenansa di Cacho pa nan tambe keda informa tocante con pa actua y/of con nan por asisti nan coleganan den bario den incidentenan cu ta encera un cacho, principalmente incidentenan di mordemento.

Esaki, e documento a sigui splica, ta pasobra KPA a cuminsa cu un campaña di informacion “Cacho Den Cura” dia 1 di juli 2023, pa asina por tuma accion represivo entrante september 2023. E ora ey principalmente a organisa accionnan den colaboracion cu Post Aruba N.V., cu a resulta den un total di 98 boet y 200 advertencia cu a ser emiti den 2 luna.

Den 2024, debi na e rol general di e comision aki y caminda tabata necesario, e comision di accion a duna sosten riba varios nivel. A duna sosten na entre otro DOW pa loke ta trata construccion di un Departamento di Control di Bestia, a duna sosten na diferente Organisacion No Gubernamental cu ta traha den e area aki, na DEA relacion cu material educativo “Mi Mascota Ta Mi Responsabilidad – Material educativo Cacho”, y colaboracion cu KPA ainda ta den full swing.