A pesar di evaluacion positivo pa Aruba, Fitch Ratings ta pronostica un caida leve den crecemento economico

Manera ta conoci, diaranson e compania di rating, Fitch Ratings ta revisa Aruba su perspectiva pa ‘positivo’ basa riba Aruba su economia y finanzas publico. E rapport di e compania ta detaya diferente punto clave cu nan ta usa y wak pa evalua e pais.

E compania ta elabora ariba e impulsornan clave di cualificacion cu a conduci na e reevaluacion di perspectiva positivo. E rapport ta splica cu e revision di e perspectiva pa positivo ta refleha e institucionalisacion mas grandi di e marco fiscal di Aruba, cu ta inclui e meta pa surplus fiscal en general y un punto di debe, a pesar di un historial cortico, un trayectoria di debe cu ta cay rapidamente, y crecemento continuo dirigi pa sector turistico.

Nan ta remarca cu e puntuacion di Aruba ta sigui beneficia di e fuerte sosten institucional y financiero Hulandes como un miembro di Reino di Hulanda cu ‘status aparte’, demostra door di e sosten di likides urgente brinda durante e pandemia cu a ser refinancia recientemente pa un debe a largo plaso, manera tambe e standardnan fuerte di gobernacion y un entrada per capita halto.

Di otro banda, nan ta indica cu e puntuacionnan ta limita pa e debe publico, cu ainda ta halto y e carga di interes, y e vulnerabilidad di economia di un solo pilar pa shocknan externo.

Fitch ta resalta cu economia di Aruba ta sigui crece, cual ta dirigi pa e bon desempeño di e sector turistico, pero a modera despues di e recuperacion inicial for di e pandemia. Fitch ta calcula un crecemento di 3% na 2023, bao di 10.5% na 2022. E yegada di turista ta sigui alcansa cifranan record nobo, cu yegada calcula na 2023 di 111% compara cu e nivelnan di 2019, y e ingreso y entrada turistico per camber disponibel yegando 137% y 114% respectivamente den comparacion cu e nivelnan di 2019.

Fitch ta pronostica cu e crecemento aki ta bay baha un poco na 2024-2025 (promedio 2.3%), pero lo keda riba e crecemento potencial mientras algun hotel grandi nobo habri, expandiendo cantidad di camber cu 10%. Un restriccion den e mercado laboral por frena e crecemento y causa presion ariba salario.

Pa loke ta e meta fiscal incorpora den ley, e compania ta indica cu a actualisa e cuadro legal na december 2023 pa haci e meta di surplus fiscal en general y e punto di debe legalmente vinculante. E cambionan aki a keda aproba unanimamente, brindando prueba di e compromiso bipartidista na consolidacion fiscal y mas confiansa den institucionalisacion di e marco fiscal nobo.

Nan ta señala cu e metanan incorpora ta rekeri un surplus di 1% di GDP en general y punto di debe pa GDP di 70% pa 2031 y 50% pa 2040. Supervision fiscal ta sigui ser brinda bao di Colegio di Supervision Financiero di Aruba (CAft).

Den e rapport Fitch ta pronostica cu e balansa fiscal a mehora cu 2.8% na 2023 pa un surplus di 2% di GDP, superando e meta di 1%, impulsa den gran parti door di entrada for di BBO (belasting op bedrijfsomzet) na frontera, efectivo desde october 2023, y e aumento di e tarifa di belasting.

Nan ta indica cu BBO na frontera tambe a resulta den miho cumplimento di belasting, generando dato adicional y ta crea un enlace entre e unidad di aduana y e departamento di belasting. Nan ta agrega cu crecemento den e cuenta di salario di sector publico a keda relativamente conteni y ta sigui cumpli cu 10% di GDP. “Gobernacion tin plan pa distribui entrada extra inespera riba e 1% di meta fiscal di GDP entre reduccion di debe y gastonan di capital mas halto.

Fitch ta sigui splica den e rapport cu nan ta pronostica un caida leve den e surplus fiscal den 2024 pa 1.6% di GDP y 1.1% na 2025, reflehando costo di interes mas halto despues di re-negociacion di e prestamo di sosten di likides di Hulanda. Sinembargo, nan ta spera cu e impacto lo ser mitiga pa medio di continua cu e desempeño fuerte di entrada y restriccion di gasto.

Tocante sosten financiero Hulandes, manera ta conoci Aruba a yega na un acuerdo cu Hulanda ariba e refinanciamento di e prestamo di sosten di likides di e pandemia (15% di GDP) na october 2023. Aruba no a pasa un Ley di Reino riba supervision financiero, un di e condicionnan pa refinancia e prestamo na un tasa di interes mas faborabel.

A pesar di esaki, e debe a wordo converti den un prestamo di 20 aña, cu un tasa di interes di 6.9%, resaltando e sosten considerable di Hulanda pa Aruba. E acuerdo ta laga e opcion habri pa baha e tasa di interes si e Gobierno di Aruba acorda ariba un Ley di Reino. E legislacion di supervision financiero local no ta dificil di diferencia for di e Ley di Reino. Un Ley di Reino ta un acuerdo entre Parlamentonan cu un partido no por cambia unilateralmente.

Fitch ta calcula cu e debe di gobierno a baha pa 73.2% di GDP na 2023 riba base consolida pa Fitch (83% riba base no consolida incluyendo e debe di gobierno di APFA), a baha for di 80.2% di GDP na 2022 y un peak di pandemia di 99% na 2020 cual ainda ta mas halto cu e promedio di ‘BB’ di 52%.

Nan ta señala cu e caida rapido di debe a ser impulsa door di recuperacion di entrada, reduccion di gasto y e recuperacion continuo den GDP nominal. Nan ta agrega cu e surplus fiscal sosteni pa e fuerte desempeño di entrada for di BBO na frontera y miho cumplimento di belasting ta sostene pronosticonan di Fitch pa debe baha te 64.4% na fin di 2025, den liña cu su pik prome cu pandemia na 2017. Interes pa entrada ta keda halto na 17.1% den 2023, compara cu e promedio di ‘BB’ di 9.6%, y ta spera cu e lo subi pa 19.2% na 2024.

Segun e rapport Fitch ta pronostica cu inflacion promedio a baha for di 5.5% na 2022 pa 3.5% na 2023, como e prijs di productonan importa y prijs di cuminda y combustible global a suavisa, y por baha mas leu te na 2% na 2025. Nan ta indica cu Banco Central a cuminsa relaha exigencianan di reservanan fuerte for di un pik di 25.5% pa 22%.

Nan ta señala cu e postura monetario rigido, sinembargo, tin impacto limita riba tarifanan di interes domestico (relativamente stabiel alrededor di 6%) brinda pa e mecanismo di transmision monetario deficiente cu un cantidad chikito di banconan likido cu ta concuri pa clientenan mayormente riba tarifanan. E cambio fiha ta e punto di anker di politica clave di Aruba.

Ariba e tema di eleccionnan na 2025, Fitch ta indica cu a pesar cu eleccion mester tuma luga den juni 2025, e hecho cu e metanan fiscal a ser incorpora den leynan y a ser adopta unanimamente ta yuda sostene continuidad den politica fiscal sin importa e resultadonan.

Por ultimo, tocante gobernacion, Fitch ta splica cu Aruba tin un Puntuacion di Relevancia ESG (RS) di ‘5[+]’ & 5[+]’, respectivamente pa Stabilidad Politico y Derechonan y pa Regla di Ley, Calidad Institucional y Regulatorio y Control di Corupcion.

E puntuacionnan aki ta refleha e peso halto cu Indicador di Gobernacion di Banco Mundial (WBGI) tin den e modelo propietario di Puntuacion di Soberano (SRM). Aruba tin un ranking halto di WBGI na 84%, reflehando su historial largo di transicionnan politico stabiel y cu pas den transicionnan politico, derechonan estableci pa participacion den proceso politico, capacidad institucional fuerte, regla di ley efectivo y un nivel abou di corupcion.