Diamars 12 di december Parlamento di Aruba a cuminsa cu e tratamento di presupuesto di 2024. Un di e prome presupuestonan cu a ser trata tabata Ministerio di Economia, Comunicacion y Desaroyo Sostenible di Minister Geoffrey Wever. E mandatario a elabora ariba diferente topico, un di nan e crecemento economico di pais Aruba, e GDP di e pais y proyeccionnan pa loke ta aña 2024.

Minister Wever a splica cu manera ya ta conoci, aña pasa presupuesto di gobierno a contra cu un surplus aña di 1%, e aña aki atrobe tabatin un surplus di 1% y durante e tratamento di e presupuesto complementario di 2023 a adapta e cifra aki na 1.9%, cu ta nifica mas di 50 miyon florin extra ma entrada.

El a remarca cu e entrada extra aki preferiblemente nan lo a invertie full back den comunidad y den proyectonan, y no na reduccion di debe nacional. El indica cu e gobierno actual hereda un debe nacional di 5.6 biyon florin, cu ta 82% di e GDP, cual el a señala, montonan demasiado halto y iresponsable pa un pais y pa e motibo ey tambe mester logra surplus pa reduci e debe.

“E ta necesario pasobra e peso di interes cu ta pisa riba e presupuesto di pais Aruba ta inaceptable y demasiado halto y ta stroba nos den nos crecemento economico y crecemento di full e pais,” el a señala.

E meta, cual ta estableci tambe e acuerdo cu Hulanda y cambionan den e ley di LAft, ta cu pa aña 2031, gobierno mester baha e debe nacional na 70% di e GDP, y pa aña 2040 esaki mester baha na 50%.

“Ta decisionnan cu mester wordo tuma pero preferiblemente nos no ta den un situacion cu mester inverti surplus pa reduci debe, pero si no cu por inverti e surplus back den comunidad y mi ta kere esey ta bay ta e tarea di e gobierno aki,” el a agrega.

Elaborando ariba e tema di crecemento economico y e rindimento di e economia di pais Aruba, e mandatario a remarca cu ora cu nan a prepara e presupuesto complementario 2023 y presupuesto 2024, a haci esaki basa riba cifranan di luna di mei di 2023, prepara door di Departamento di Asuntonan Economico, y na e momento ey a premira cu e crecemento economico nominal den 2023 lo ta di 10.1% hibando e GDP na 6.5 biyon florin, cu un inflacion di 4.4%.

Pa e aña binidero, basa riba e proyeccionnan aki, a premira un crecemento economico di 4.6% nominal hibando e GDP na 6.8 biyon florin y cu un inflacion di 3.2%.

Esey tabata e proyeccionnan basa riba e cifranan di luna di mei ultimo, pero aworaki, cu monitoreo continuo di e rindimento e economia basa riba cifranan di CBS y cifranan di CBA, gobierno ta trahando riba proyeccionnan nobo pa loke ta e economic outlook.

Minister Wever a indica cu el a ricibi esakinan den concepto y aworaki ta realisando e revision general, pero manera e mandatario a splica durante e tratamento di e presupuesto complementario di 2023, e cifranan macro economico ta mas positivo di locual cu nan tabata na mei di 2023.

El a splica cu pa loke ta 2023, aworaki nan ta premira un crecemento economico nominal di 13.7% compara cu e 10.1% cu a wordo proyecta na 2023 y e crecemento economico nominal positivo aki bay hiba e GDP na en bes di 6.5 biyon, na 6.8 biyon florin pa fin di e aña aki. Esaki tambe ta nifica cu e cifranan di inflacion ta mas positivo, unda cu inicialmente a proyecta un inflacion di 4.4% pa loke ta 2023 y na e momento aki e inflacion lo ta 3.6%.

Minister Wever a resalta cu e cifranan macro economico pa e aña aki ta mas positivo di locual cu nan a premira na mei 2023 y e indicador mas fuerte di esaki ta e rindimento di pais Aruba su turismo.

El a remarca cu despues di pandemia Aruba a logra recupera su posicion y mercado turistico y aworaki por mira cu esey ta traduci su mes na un crecemento ainda mas positivo y un crecemento economico cu a surpasa e cifranan di aña 2019, e aña cu tabata registra como e miho aña pa turismo den historia di pais Aruba, cu un GDP di 6 biyon florin.

Pa loke ta aña 2024, el a señala cu e crecemento economico nominal ta 3% y inicialmente esaki tabata na 4.6%. El a splica cu esaki por mustra manera un reduccion, pero e no ta mirando cu e ta un crecemento economico nominal compara cu e aña anterior y door cu e aña anterior a subi di 10.1% pa 13.7%, e ora e cambionan den terminonan nominal ta menos, pero na final di dia e lo hiba e GDP den 2024 na 7 biyon florin, un aumento di un biyon florin compara cu prome cu pandemia.

Tambe pa loke ta e cifranan di inflacion pa 2024, el a indica cu e calculacionnan ta na 3.5%, cual ta mas abao di locual a ser calcula inicialmente.

Tocante con a yega na e crecemento economico positivo aki, Minister Wever a splica cu esaki ta entre otro door di turismo, pero tambe door di inversionnan priva cu ta wordo haci. “Inversionnan priva mi ta kere ta un señal cu tin confiansa den nos pais y pa motibo di e confiansa aki ta calcula cu e inversionnan priva lo yega un monto di un biyon florin den 2024,” el a bisa.

El a agrega cu e inversionnan adicional di 25.1 miyon florin den inversion di capital cu lo wordo ehecuta den 2024, tambe ta un indicador di e economia como tambe inversionnan publico.

Di mesun manera el a señala cu ta premira cu e salarionan den sector priva lo recupera y cu esaki lo bay ahusta su mes poco poco na nivelnan di pre-pandemia. “No tur salario, pero nos ta premira y nos ta wak cu tin desaroyonan positivo den e contexto aki y esaki ta nifica cu nos hendenan ta hayando mas entrada cu tambe ta bay drive e consumo priva,” el a indica.

Pero a pesar cu por tin cifranan positivo y crecemento nominal positivo, miho cu añanan anterior y miho cu e proyeccionnan, esaki ainda no ta traduci su mes den un mehoracion di poder di compra di e ciudadanonan.