Recientemente College Aruba Financieel Toezicht (CAft) a publica su reaccion riba e di cuater Uitvoeringrapportage (UR) di aña 2024, cual nan a ricibi dia 19 di februari 2025.

E di cuater UR ta mustra un surplus provisional den sector colectivo di AFL. 477 miyon, cu ta 6.3% di e Producto Interno Bruto (PIB). Cu e surplus aki Aruba ta cumpli cu e normanan financiero pa surplus segun e “Landsverordening Aruba financieel toezicht” (LAft).

CAft a splica cu di e surplus aki, mas o menos AFL. 300 miyon a ser usa pa pago di debe y pa motibo di esaki Aruba su debe a baha pa 69% di e PIB na fin di 2024. Esaki ta indica cu Aruba ta tuma paso bon pa fortalece su finanzas publico.

Sinembargo, CAft ta remarca ta crucial pa keda tene e progreso aki. Esaki ta nifica un uso strategico di recurso pa 2025 y despues, cu un enfoke riba fortalecemento di e fundamentonan di economia. Segun e organo sin un reforma structural y mas pago di debe, Aruba lo keda fragil den caso di shocknan economico.

Saldo di financiamento

CAft ta señala cu danki na un crecemento economico fuerte, medidanan di politica manera introduccion di BBO na frontera, un aumento di tarifa di BBO, y aumento den esfuerso pa colecta impuesto di salario, e ingreso di pais y di otro entidadnan di sector colectivo a subi hopi.

E combinacion di un calculacion conservativo y un gasto mas abou di loke tabata plania a yega na un saldo di financiamento provisional di Afl. 477 miyon. Cu esaki, e organo a señala, Aruba ta cumpli cu e normanan di surplus financiero segun LAft y tambe cu e compensacion di deficit cu ta exigi legalmente.

Ratio di debe

CAft ta splica den su reaccion cu e total di debe publico di Aruba na fin di 2024 ta AFL. 5.266 miyon, cu ta 69% di e PIB. Durante 2024, Aruba a paga rond di AFL. 300 miyon di debe. Den comparacion cu fin di 2023, el a baha cu mas o menos 10%. Esaki ta nifica cu e meta di 70% di debe ya ta logra, y Aruba ta riba bon caminda pa logra un ratio di 50% di PIB prome cu 2040.

CAft a remarca cu a pesar di e reduccion aki, Aruba ta keda fragil na shock economico. Ademas, e organo ta agrega, e gastonan di interes ta sigui ta un peso riba e presupuesto (actualmente 17% di e presupuesto). Pa fortalece e resiliencia financiero di Aruba, CAft ta subraya, e reduccion di debe mester sigui. Un marco di supervision nobo (Rijkswet), e organo a indica, por duna perspectiva pa gasto di interes mas abou, lagando espacio pa mas gasto gubernamental of inversion.

Gasto

Pa loke ta gasto, CAft ta señala cu e gasto total ta mustra un subgasto di AFL. 61 miyon compara cu e segundo cambio aproba den presupuesto 2024. E subgasto, e organo a splica, ta mas notabel den gasto di personal, gasto di producto y servicio, y subdivisionnan.

CAft ta pidi pa splica e subgastonan aki den e UR. Mirando e tendencia di gasto mas abou cu plania riba producto y servicio, CAft a conseha varios bes cu e gasto aki mester ser revisa criticamente y ahusta abou den presupuesto.

E gasto di personal a resulta na 8% di PIB na fin di 2024, indicando cu Aruba ta cumpli cu e normanan di gasto di personal segun LAft.

Inversion

CAft ta indica cu Aruba a realisa te cu e di cuater kwartaal di 2024 solamente 21% di e presupuesto pa inversion, cu ta mas o menos AFL. 14 miyon.

A pesar di algun gasto adicional cu por surgi, CAft ta premira cu lo tin un subgasto den inversion pa e aña aki. CAft ta conseha Aruba un biaha mas pa desaroya un plan di inversion pa varios aña, cu por yuda cu un uso mas eficiente di e fondonan di inversion, segun e capacidad di ehecucion disponible.

Maneho financiero

Den contexto di e Landspakket y e roadmap pa un miho maneho financiero, gobierno ta trahando hunto cu e Tijdelijke Werkorganisatie pa mehora e proceso di ehecucion y rindimento di cuentanan.

CAft a subraya cu nan ta nota desaroyonan positivo. Pa prome biaha den 2022, un reportahe di ehecucion a ser entrega na tempo.

E conseho a señala cu e cuenta anual 2019 ya a ser presenta na e parlamento y ta trahando pa completa e cuentanan anual di 2020-2023. CAft a enfatisa cu un bon maneho financiero ta crucial pa Aruba pa garantisa un finanzas publico sostenibel y structuralmente stabiel.