E ultimo actualisacion duna ayera parti pa PR di DVG, Jurette Croes tabata mustra uno positivo pa loke ta trata e desaroyo di e coronavirus/Covid-19 na Aruba. Menos caso positivo, mas hende recupera, menos den cuarentena y te aworaki no mas morto pa causa di e virus aki.
Croes a bisa cu a pesar cu e casonan positivo ta relativamente abao y e cuarentena ta birando menos, pero DVG no por sigura cu nos tin e contagio di e virus completamente domina. “Nos tin como comunidad sigui mantene na e criterionan y medidanan cu gobierno a pone,” el a bisa. Nan lo keda pendiente pa e siguiente dianan y simannan nan lo sigui monitor con e virus ta sigui evoluciona y si e virus no ta sigui plama.
Ayera pa 2’or atardi e casonan di coronavirus na Aruba tabata como lo siguiente: 97 caso positivo y 51 persona a recupera, kiermen tin dos caso extra di persona cu a recupera. Actualmente tin 44 casonan activo di persona cu ta positivo y cu na e momento aki ta bao isolacion. Negativo nos tin 1.348 caso y 1.445 test a wordo haci te cu ayera tardi.
Ademas tin 83 persona den cuarentena y cuater persona interna den hospital, 3 den ICU y 1 den piso normal. Lamentablemente nos tin 2 persona cu a fayece y cu nan tabata positivo pa Covid-19.
