Minister di Finanzas y Asunto Economico, Xiomara Maduro a descarta e posibilidad di introduci belasting nobo pa recupera riba loke caha di gobierno mester a haya debi na e reduccion di impuesto otorga pa medio di e reforma fiscal.
Segun e mandatario, organo di supervision financiero CFT a duna conseho riba presupuesto 2021 relaciona cu un impuesto nobo. Sinembargo CTF su recomendacion ta pa gobierno “hala bek’ locual nan a duna di rebaho pa medio di e alivio fiscal II. Pero gobierno ta prefera di lag’e pa locual e ta. Kiermen gewoon un conseho. Pero si nan a duna un splicacion riba nan decision pa asina por compronde riba kico a wordo haci.
Pa e mandatario en cuestion e parti mas importante ta cu e linea cora mester ta cu Aruba mester reactiva su economia, pasobra nos no por keda presta placa keto bay sin limite. P’esey e mandatario su punto di bista ta cu e pakete di alivio fiscal cu ta wordo duna pa medio di reduccion di inkomstenbelasting y/of loonbelasting ta un factor cu lo por yuda reactiva nos economia. E reduccion aki ta necesario pa asina mas hende por keda cu mas placa den nan man y asina contribui na economia.
Den nan splicacion na CFT e cambio aki ta wordo traduci –segun e mandatario- budget neutral pa motibo cu nan a bin cu otro incentivo fiscal den e ambito di dividend. Den e caso aki nan ta permiti pa hendenan cu tin dividend acumula den exterior pa nan por trece nan placa Aruba. Locual prome no tabata posibel.
Eynan gobierno por mira cu e fondo lo yuda recupera of cubri e 15 miyon cu gobierno ta bay perde di haya di reduccion di inkomstenbelasting/loonbelasting. “Eigenlijk bo ta bay tabla, e ta bira budget neutral,” el a declara.
Nan por wak cu ya caba e ta den linea di locual gobierno ta bin haciendo prome cu Covid, esta baha e peso di impuesto directo y bay mas den direccion di impuesto indirecto. Na januari 2019 gobierno a baha inkomstenbelasting/loonbelasting. Nan a simplifica di 14 tarifa a bira 4 tarifa. Y un biaha mas nan a baha e dos prome tarifa cu 2%, el a splica. E maneho aki –segun e mandatario – ta yuda activa economia di nos pais.
